عزیزاللہ خان بی بی سی اردو ڈاٹ کام کوئٹہ

	بلوچستان کے مختلف علاقے کافی عرصے سے تخریبی کارروائیوں کی زد میں ہیں (فائل فوٹو)

یہ دھماکہ ایک پبلک کال آفس (پی سی او) میں صبح ساڑھے گیارہ بجے کے قریب ہوا ہے جس میں پی سی او کا مالک بہادر ہلاک ہوگیا ہے جبکہ ایف سی کے دو اہلکاروں سمیت تیرہ افراد زخمی ہوئے ہیں۔

کوہلو کے ناظم علی گل مری نے کہا ہے کہ تین شدید زخمیوں کو ڈیرہ غازی خان بھیج دیا گیا ہے جبکہ باقی افراد کو کوہلومیں طبی امداد فراہم کی جا رہی ہے۔

علی گل مری اور نائب ناظم نصیب اللہ مری نے بی بی سی کوبتایا ہے کہ یہ دہشت گردی کی واردات ہے اور وہ اس کی سخت الفاظ میں مذمت کرتے ہیں۔ انہوں نے کہا ہے کہ اس طرح عام شہریوں کو نشانہ بنانا غیر انسانی فعل ہے۔

علی گل مری کچھ عرصہ کوہلو سے دور رہے ہیں خصوصاً ان دنوں میں جب کوہلو میں مبینہ فوجی کارروائی شروع کی گئی تھی لیکن اب انہوں نے کہا ہے کہ وہ کوہلو پہنچ گئے ہیں اور ضلعی حکومت کا اجلاس عنقریب طلب کیا جائے گا۔ علی گل کے بھائی گزشتہ ایک ماہ سے لاپتہ ہیں۔ علی گل نے بتایا ہے کہ ان کے بھائی ایلیمنٹری کالج قلات کے پرنسپل ہیں۔