عزیزاللہ خان بی بی سی اردو ڈاٹ کام کوئٹہ

	بلوچستان میں متحدہ مجلس عمل بھی مشترکہ مظاہرہ کر چکی ہے

بلوچستان اسمبلی میں قائد حزب اختلاف کچکول علی ایڈووکیٹ کی قیادت میں اراکین نے اسمبلی کی عمارت سے گورنر ہاؤس تک مارچ کیا اور گورنر ہاؤس کے سامنے نعرہ بازی کی ہے۔

حزب اختلاف کے اراکین نے بلوچستان اسمبلی کا اجلاس منعقد کرانے، بلوچستان میں مبینہ فوجی کارروائی بند کرنے اور گرفتار کارکنوں کی فوری رہائی کا مطالبہ کیا ہے۔

ان جماعتوں میں نیشنل پارٹی، بلوچستان نیشنل پارٹی، جمہوری وطن پارٹی پشتونخواہ ملی عوامی پارٹی اور پاکستان پیپلز پارٹی کے اراکین شامل تھے۔

ادھر جمعرات اور بدھ کی درمیانی شب کوئٹہ سے کوئی ستر کلومیٹر دور جنوب میں مچھ کے علاقے میں نا معلوم افراد نے بجلی کے تین پولز پر حملہ کیا ہے جس سے ایک پول مکمل طور پر تباہ ہوا ہے جبکہ دو پولز کو جزوی نقصان پہنچا ہے۔

کوئٹہ میں بجلی فراہم کرنے کے محکمہ کے ترجمان جبریل خان نے بتایا ہے کہ اس حملے سے تین سو میگا واٹ بجلی کی کمی پیدا ہو گئی ہے جس وجہ سے اب لوڈ شیڈنگ کرنا پڑے گی۔

انھوں نے کہا کہ ان کھمبوں کی مرمت کا کام ایک ہفتے میں مکمل کیا جائے گا۔

ترجمان نے بتایا کہ ان دھماکوں سے مجموعی طور پر بیس ملین روپے روزانہ کا نقصان ہو رہا ہے جبکہ کھمبوں اور تاروں کا نقصان کوئی دو ملین روپے تک کا ہے۔

اس کے علاوہ گزشتہ روز کوہلو سے لوگوں نے بتایا ہے کہ مسلح قبائل اور سکیورٹی فورسز کے مابین جھڑپیں ہوئی ہیں جس میں فورسز کا جانی نقصان بھی ہوا ہے لیکن سرکاری سطح پراس کی تصدیق نہیں ہوسکی۔

ادھر ڈیرہ بگٹی سے بھی اسی طرح کی جھڑپیں ہوئی ہیں لیکن ان کی تصدیق نہیں کی جا رہی۔

دریں اثناء ایک نامعلوم شخص نے ٹیلیفون پر اپنا نام میرک بلوچ بتایا ہے اور کہا ہے کہ مچھ میں بجلی کے کھمبوں پر حملوں کی ذمہ داری وہ بلوچ لبریشن آرمی کی طرف سے قبول کرتے ہیں۔

اسی طرح ایک اور شخص نے ٹیلیفون پر اپنا نام آزاد بلوچ بتایا ہے اور کہا ہے آج ڈیرہ بگٹی اور کوہلو کے سرحدی علاقے کرمو وڈھ میں فرنٹیئر کور کی ایک چوکی پر راکٹ داغے گئے ہیں جس سے ایف سی کے اہلکاروں کا جانی نقصان ہوا ہے۔

جبکہ گزشتہ روز لہڑی کے علاقے میں سیکورٹی فورسز کی ایک گاڑی بارودی سرنگ سے ٹکرا گئی تھی جس سے فورسز کا جانی نقصان ہوا تھا۔انھوں نے کہا کہ ان واقعات کی ذمہ داری وہ بلوچ لبریشن آرمی کی طرف سے قبول کرتے ہیں۔

فرنٹیئر کور کے ترجمان نے کہا ہے کہ کرمو وڈھ میں ان کے تین اہلکار معمولی زخمی ہوئے ہیں جنہیں موقع پر ابتدائی طبی امداد فراہم کر دی گئی ہے۔