حسن مجتبیٰ بی بی سی اردو ڈاٹ کام، سان ڈیاگو

	بلوچ ویب سائيٹ کی پریس ریلیز انٹر نیٹ پر سندھی چیٹ گروپوں کے مابین بھی تقسیم کیا گیا ہے-

ویب سائیٹ پر میر آزاد بلوچ کے نام سے چھپنے والی پریس ریلیز میں کہا گیا ہے: ’ پاکستان کی انٹیلیجنس ایجنسیاں پہلے ریاستی دہشتگردی کے ذریعے عوامی مقامات پر بم پھاڑتی ہیں اور پھر اس کا الزام بلوچ حریت پسندوں پر ڈال رہی ہیں۔‘

پریس ریلیز نے کوئٹہ میں دھماکوں کو پاکستانی فوجی حکومت اور انٹلیجنس ایجنسیوں کی طرف سے بلوچ عوام اور بلوچ حریت پسندوں کے درمیان دوریاں پیدا کرنے کی سازش قرار دیا ہے-

پریس ریلیز میں کہا گیا ہے کہ ’بلوچ لبریشن آرمی (بی ایل اے) صرف ریاستی املاک اور فوجیوں کو نشانہ بناتی ہے، نہ کہ معصوم عوام کو۔ بلوچ لبریشن آرمی والے پیشہ ور سپاہی ہیں اور انہیں گوریلا جنگ اور دہشتگردی میں فرق معلوم ہے- ‘

پریس ریلیز کے بقول اگر پاکستانی فوج بلوچ لبریشن آرمی کو بم دھماکوں کا ذمہ دار گرداننا چاہتی ہے تو پھر وہ کوئٹہ کی چلتن مارکیٹ ( جہاں فوجی خریداری کرتے ہیں) میں بم پھاڑے جس کا اعتراف بلوچ لبریشن آرمی خوشی سے قبول کرے گی-‘

پریس ریلیز کے آخر میں کہا گیا ہے کہ خفیہ ایجنسیاں بلو‍چ لبریشن آرمی کی تصور کشی کرکے امریکہ کو اسے دہشتگرد تنظیم قرار دینے پر قائل کرنے کی کوشش کررہی ہیں-

بلوچ ویب سائيٹ کی پریس ریلیز کوامریکہ میں رہنے والے کچھ سندھی قوم پرست سمجھے جانے والے پروفیشنلز کی طرف سے انٹرنیٹ پر سندھی چیٹ گروپوں کے مابین بھی تقسیم کیا گیا ہے-

اگرچہ پاکستان میں بہت سے بلوچ رہنما اور سیاسی تنظیمیں اس ویب سائيٹ سے اپنے کسی بھی تعلق کی تردید کرتے رہے ہیں لیکن یہ ویب سائيٹ پاکستان سے باہر ’بلوچ جلاوطن حکومت‘ اور اپنے رابطے کا پتہ اسرائيل کے شہر یروشلم میں ہونے کے دعوے کرتی ہے-