عزیزاللہ خان بی بی سی اردو ڈاٹ کام، کوئٹہ

	پائپ لائن کی تباہی سے کوئٹہ اور دیگر علاقوں کو سپلائی منقطع ہو گئی ہے

یہ واقعہ آج صبح کوئٹہ سے کوئی چالیس کلومیٹر دور جنوب میں دشت کے مقام پر پیش آیا ہے۔ لیویز اہلکاروں نے بتایا ہے کہ نا معلوم افراد نے گیس پائپ لائن کو دھماکہ خیز مواد سے اڑا دیا ہے۔ انہوں نے کہا کہ یہ چوبیس انچ قطر کی پائپ لائن ہے جس کا کوئی آٹھ فٹ کا ٹکڑا اڑ گیا ہے۔

اس دھماکے کے بعد کوئٹہ اور دیگر قریبی علاقوں کو گیس کی ترسیل منقطع ہو گئی ہے۔ گیس کمپنی کے حکام سے بارہا رابطے کے کوشش کی لیکن ان سے رابطہ نہیں ہو رہا ہے۔

مستونگ کے پولیس افسر حامد شکیل نے بتایا ہے کہ پائپ لائن غیر آباد علاقے سے گزرتی ہے جہاں نا معلوم افراد نے اسے تباہ کر دیا ہے۔ انہوں نے کہا کہ گیس کمپنی کا عملہ کچھ دیر تک پہنچ جائے گا جس کے بعد اس کی مرمت کا کام شروع کیا جائے گا۔

حامد شکیل نے بتایا کہ بجلی کے ایک کھمبے کے قریب بم رکھے گئے تھے جن میں سے ایک پھٹ گیا ہے جبکہ باقی ناکارہ بنا دیے گئے ہیں۔ کھمبے کے قریب دھماکے سے کھمبے کو نققصان پہنچا ہے لیکن بجلی کی ترسیل بحال ہے۔

ادھر ڈیرہ بگٹی میں لوٹی گیس فیلڈ کے قریب سے بھی دھماکے کی اطلاع ہے۔ ڈیرہ بگٹی کے ضلعی رابطہ افسر عبدالصمد لاسی نے کہا ہے کہ نامعلوم افراد نے کل رات راکٹ داغا تھا جو پانی کے پمپنگ سٹیشن کے ساتھ گرا لیکن کوئی زیادہ نقصان نہیں ہوا ہے۔