اعجاز مہر بی بی سی اردو ڈاٹ کام، اسلام آباد

	امریکہ گوانتاناموبے قید خانے سے مزید قیدی رہا کرنے کے لیے تیار ہو گیا ہے: آفتاب شیرپاؤ

پاکستان ٹیلیویژن کے ایک پروگرام میں بات کرتے ہوئے پاکستان کے وزیر داخلہ نے کہا ہے کہ گوانتانامو بے میں قید پاکستانیوں کی صورتحال جانچنے کے لیئے نیشنل کرائسس منیجمینٹ سیل کے سربراہ برگیڈیئر ( ریٹائرڈ) جاوید اقبال چیمہ کی سربراہی میں جلد وفد امریکہ روانہ ہونے والا ہے۔

وزیر داخلہ کا کہنا ہے کہ انٹر نیشنل ریڈ کریسینٹ کے مطابق کئی پاکستانی افغانستان کی جیلوں میں بھی قید ہیں اور حکومت جلد ایک اور ٹیم وہاں بھیجوا کر صورتحال معلوم کرے گی۔

اس بارے میں جب بی بی سی نے برگیڈیئر چیمہ سے رابطہ کیا تو انہوں نے بتایا کہ امریکہ کی حراست میں انتیس پاکستانیوں میں سے کچھ بگرام میں ہیں جبکہ کچھ گوانتانامو بے میں ہیں۔

دونوں امریکی حراستی مراکز میں پاکستانیوں کی درست تعداد کے بارے میں انہوں نے کوئی تفصیل تو نہیں بتائی لیکن اتنا کہا کہ جن آٹھ پاکستانیوں کو رہائی پر اتفاق ہوا ہے اس میں کچھ بگرام اور کچھ گوانتانامو بے سے رہا ہوں گے۔

رہائی پانے والوں میں کسی اہم قیدی کے سوال پر انہوں نے کہا کہ پاکستان کے لیئے وہاں قید تمام پاکستانی ایک ہی اہمیت کے حامل ہیں۔

واضح رہے کہ رواں سال انیس اپریل کو امریکی فوجی ہیڈ کوارٹر سے جاری ہونے والی فہرست میں بتایا گیا تھا کہ تیرہ پاکستانی گوانتانامو بے میں قید ہیں۔