اعجاز مہر بی بی سی اردو ڈاٹ کام، اسلام آباد

	’ڈاکٹر فاروق کو 29 ماہ قید تنہائی میں رکھا گیا، اس دوران ان پر دو بار دل کے خطرناک دورے پڑے‘

پاکستان کے بعض اخبارات میں سنیچر کو خبر شائع ہوئی ہے کہ حکومت نے ڈاکٹر فاروق کو رہا کردیا ہے لیکن اس کی تصدیق نہ حکومت کرتی ہے اور نہ ہی ان کے اہل خانہ۔

ڈاکٹر فاروق کے آر ایل میں جوہری آلات اور مواد خریدنے کے شعبے کے سربراہ تھے اور انہیں تئیس نومبر سن دو ہزار تین کو اپنے گھر سے اس وقت گرفتار کیا گیا تھا جب اس ادارے کے سربراہ اور پاکستان کے جوہری بم بنانے والے سائنسدان ڈاکٹر عبدالقدیر خان پر جوہری پھیلاؤ کے الزامات لگے تھے۔

کے آر ایل کے تین اور ملازمین جن میں ڈاکٹر نذیر احمد، بریگیڈیئر ( ر) سجاول خان اور میجر ( ر) اسلام الحق کو بھی حکومت نے حراست میں لیا تھا اور انہیں جولائی سن دو ہزار چار میں ہی رہا کردیا تھا۔

لیکن حکومت نے ڈاکٹر فاروق کو رہا نہیں کیا تھا اور بتایا جارہا تھا کہ وہ ڈاکٹر عبدالقدیر خان کے انتہائی قریبی ساتھی ہیں اور انہیں جوہری پھیلاؤ کے نیٹ ورک کے بارے میں دیگر افراد کی نسبت زیادہ علم ہے۔

کے آر ایل کے ان ملازمین کے ورثاء نے ایک رہائی کمیٹی بنائی تھی اور مظاہرے بھی کیئے تھے۔ اس رہائی کمیٹی کے سربراہ بریگیڈیئر سجاول خان کے صاحبزادے ڈاکٹر شفیق کو بنائے گئے تھے۔

ڈاکٹر شفیق نے سنیچر کے روز بی بی سی کو بتایا کہ ’انکل فاروق کو حکومت نے رہا نہیں کیا بلکہ تین روز انہیں گھر میں نظر بند کیا گیا ہے اور سکیورٹی کے اہلکار ان کے گھر میں تعینات ہیں‘۔

ان کے مطابق ڈاکٹر فاروق سے ان کے اہل خانہ کے علاوہ کسی کو ملنے نہیں دیا جاتا اور فون وغیرہ بھی سکیورٹی اہلکار خود اٹھاتے ہیں۔

ڈاکٹر شفیق نے بتایا کہ ڈاکٹر فاروق کو انتیس ماہ قید تنہائی میں رکھا گیا اور اس دوران ان پر دو بار دل کے شدید دورے پڑے۔ انہوں نے دعویٰ کیا کہ سکیورٹی ایکٹ کے تحت ان کے والد سمیت ڈاکٹر فاروق اور دیگر کو گرفتار کیا گیا تھا اور اس قانون کے تحت بارہ ماہ سے زیادہ عرصہ کسی کو قید نہیں رکھا جاسکتا۔

وزیر اطلاعات محمد علی درانی سے جب رابطہ کیا گیا تو انہوں نے کہا کہ انہیں معلوم نہیں ہے اور جب انہیں کوئی معلومات ملیں تو وہ خود ہی بتائیں گے۔