ہارون رشید بی بی سی اردو ڈاٹ کام، پشاور

	سکیورٹی فورسز نے شوال سے گرفتار شدہ افراد کی اطلاع پر کارروائی کی

حکام کے مطابق یہ واقعہ شمالی وزیرستان کے صدر مقام میران شاہ سے تین کلومیٹر کی دوری پر چشمہ پل کے قریب پیش آیا۔ اطلاعات کے مطابق بنوں سے یہ فوجی قافلہ میران شاہ جا رہا تھا کہ یہ واقعہ پیش آیا۔

حملہ اس وقت ہوا جب حملہ آور نے فوجی قافلے پر دستی بم پھینکا۔ جواب میں سکیورٹی فورسز کی فائرنگ سے حملہ آور ہلاک ہوگیا۔

حملہ آور کی لاش قبضے میں لے لی گئی ہے تاہم آخری اطلاعات تک اس کی شناخت نہیں ہوسکی تھی۔ لاش فوجیوں نے تحویل میں لے کر میران شاہ قلعہ پہنچا دی ہے۔

دستی بم سے دو سپاہیوں کے زخمی ہونے کی اطلاع ہے۔ مقامی افراد فائرنگ سے دو قبائلیوں کے زخمی ہونے کا بھی دعوی کر رہے ہیں تاہم حکام ان چار زخمیوں کی تصدیق نہیں کر رہے ہیں۔

ادھر میران شاہ کے مغرب میں سرحدی مقام غلام خان میں سکریپ میں دھماکے سے ایک افغان شخص ہلاک جبکہ ایک مقامی زخمی ہوئے ہیں۔