ہارون رشید بی بی سی اردو ڈاٹ کام، پشاور

	فوجی ترجمان کے مطابق کارروائی خفیہ معلومات پر کی گئی۔

حکام کے مطابق اس حملے میں غیرملکیوں کی ہلاکت بھی ہوئی ہے تاہم ان کی تعداد ابھی واضح نہیں۔

فوج کے ترجمان میجر جنرل شوکت سلطان کے مطابق سکیورٹی فورسز نے یہ کارروائی خفیہ اطلاعات کی بنیاد پر شمالی وزیرستان کے صدر مقام میران شاہ کے جنوب میں نغرگاؤں کے قریب کی۔

بدھ کی رات کو کی جانے والی اس کارروائی میں ایک مکان کو نشانہ بنایا گیا ہے جہاں غیر ملکی شدت پسند بھی موجود تھے۔

فوجی حکام کا کہنا ہے کہ اس کارروائی کے بارے میں مزید تفصیلات موصول ہونے کے بعد بتائی جائیں گی۔

اس کارروائی سے قبل ہی پشاور میں جاری ایک بیان میں حکومت نے ایک قبائلی جرگے کے گزشتہ دنوں کے اس مطالبے کو مسترد کر دیا تھا جس میں فوج کے علاقے سے انخلاء کی مانگ کی تھی۔