ہارون رشید بی بی سی اردو ڈاٹ کام، پشاور

	جرگے میں تقریًبا دس ہزار قبائلیوں نے شرکت کی تھی

صوبائی دارالحکومت پشاور میں وفاقی حکومت کے نمائندے کے طور پر قبائلی علاقوں کا نظم ونسق چلانے والے گورنر کے سیکریٹریٹ سے بدھ کو جاری ایک بیان میں واضح کیا گیا کہ قبائلی علاقے میں فوج قومی مفاد میں تعینات کی گئی ہے۔ فوج باوثوق ذرائع کی اطلاع پر غیرملکیوں کے خلاف کارروائی کرتی ہے یا پھر سکیورٹی فورسز پر حملوں کی صورت میں جوابی کارروائی کرتی ہے۔

شمالی وزیرستان کی میر علی تحصیل میں اتمانزئی قبیلے کے منعقد ایک جرگے میں جس میں تقریًبا دس ہزار قبائلیوں نے شرکت کی تھی، حکومت سے فوج کو سرحد تک محدود کرنے کا مطالبہ کیا تھا۔ جرگے نے اسلحے پر پابندی کو بھی مسترد کر دیا تھا۔

تاہم سرکاری ترجمان کا موقف تھا کہ یہ جرگہ حکومت مخالف عناصر پر مشتمل تھا اور یہ قبائلی عوام کی درست نمائندگی نہیں کرتا تھا۔ ’بہت سے نامی گرامی قبائلی عمائدین اس میں شریک نہیں ہوئے جبکہ کئی بااثر مذہبی رہنما بھی اس سے دور رہے۔ یہ جرگہ دراصل حکومت مخالف اقلیت پر مشتمل تھا‘۔

فوج کی بے دخلی کے مطالبے کے بارے میں ترجمان نے وضاحت کی کہ اس نے کبھی کسی بےقصور کے خلاف کارروائی نہیں کی بلکہ اس کا ہدف غیرملکی شدت پسند رہے ہیں تاکہ علاقے میں پائیدار امن استوار کیا جاسکے اور قبائلی اپنی روایات کے مطابق زندگی بسر کر سکیں۔

ادھر جنوبی وزیرستان میں آج ایک مسجد کے امام کی لاش ایک گڑھے سے ملی ہے۔

پچاسی سالہ حاجی فیروز خان صدر مقام وانا سے دس کلومیٹر دور دژا غنڈئی گاؤں میں مسجد کے امام تھے۔ انہیں منگل کی رات نامعلوم مسلح افراد نے اغوا کر لیا تھا۔

ان کے قتل کی وجہ واضح نہیں ہوسکی لیکن گزشتہ چار برسوں کے دوران سینکڑوں حکومت نواز قبائلی ’ٹارگٹ کلنگ‘ کا نشانہ بن چکے ہیں۔