ریاض سہیل بی بی سی اردو ڈاٹ کام ،کراچی

	سندھی پشتو اور پنجابی کے چینل پہلے سے چل رہے ہیں

اردو کے بعد تین مقامی زبانوں پنجابی، سندھی اور پشتو میں پہلے سے ہی چینلوں کی نشریات جاری ہے۔

یہ ٹی وی چینل بلوچ وائس کے نام سے پندرہ جون کو دبئی سے اپنی نشریات کا آغاز کرے گا۔ جس پر چار کروڑ (متحدہ اماراتی) درہم لاگت آئی ہے۔

بلوچ وائس بلوچی کے ساتھ براہوی، عربی اور انگریزی میں بھی اپنے پروگرام ٹیلی کاسٹ کرےگا، جبکہ اس پر خبریں، ڈرامہ، ثقافتی پروگرام، اور کھیلوں سمیت تفریحی پروگرام دکھائے جائیں گے۔

بلوچ وائس کے نمائندہ ڈاکٹر امداد بلوچ نے بی بی سی کو بتایا کہ یہ ایک تفریحی اور معلوماتی چینل ہوگا، جس میں ملکی سیاست کی حقیقی صورت حال پیش کی جائے گی۔

انہوں نے مقامی ذرائع ابلاغ سے شکوہ کرتے ہوئے کہا کہ وہ بلوچستان کی حقیقی صورتحال پیش نہیں کر رہے ہیں۔

جب ڈاکٹر امداد سے یہ سوال پوچھا گیا کہ کیا پاکستان حکومت اس چینل کی نشریات کی اجازت دے گی تو انہوں نے بتایا کہ ہمیں امید ہے کہ اجازت مل جائے گی، پاکستانی حکام سے مذاکرات جاری ہیں۔

ڈاکٹر امداد بلوچ کا تعلق بلوچستان اسٹوڈنٹس آرگنائزیشن سے بھی رہا ہے اور وہ قید و بند کی صعوبتیں بھی براشت کر چکے ہیں۔ ایک سوال کے جواب میں انہوں نے کہا کہ کیا یہ چینل کسی مخصوص سیاسی جماعت کا ترجمان ہوگا تو انہوں نے تردید کرتے ہوئے کہا کہ یہ ایک غیرجانبدار چینل ہوگا۔

بلوچ وائس نے کلچرل پروگراموں کی ریکارڈنگ بھی شروع کردی ہے۔ کوئٹہ، نوشکی اور خصدار میں کلچرل شو منعقد ہوچکے ہیں جبکہ کراچی میں اس ماہ شو منعقد کیا جائےگا۔

ڈاکٹر امداد کے مطابق بلوچ وائس کے حصص بازار میں فروخت کیے جائیں گے مگر یہ حصص کتنے ہوں گے اس کا تعین ہونا ہے۔ ایک اور سوال کے جواب میں انہوں نے کہا کہ ہمیں لوگوں کی جانب سے بھی عطیات مل رہے ہیں۔ یہاں تک کے لوگ اپنی گھڑیاں اور موبائل فون ہمیں عطیئے میں دے جاتے ہیں۔