عدنان عادل بی بی سی اردو ڈاٹ کام، لاہور

	جیو کے مالکان نشریات دینے کے عوض کیبل آپریٹروں سے پیسے لینا چاہتےہیں۔

آل پاکستان کیبل آپریٹرز ایسوسی ایشن کے رہنما ملک فرقان نے بتایا کہ پرسوں رات سے کیبل آپریٹررز نے جیو کے دونوں چینلز کی نشریات دکھانا بند کردی ہیں۔

انہوں نے کہا کہ جنگ گروپ کا جیو ٹی وی چینل، جو دبئی سے نشریات سیٹلائٹ کے ذریعے نشر کرتا ہے، نے پاکستان الیکٹرانک ریگولیٹری اتھارٹی (پیمرا) سے ڈی ٹی ایچ کا لائسنس لیا ہے اور اب یہ کمپنی کیبل آپریٹروں کو ٹی ٹی ایچ کی نشریات دینے کے لیے ان سے پیسے لینا چاہتی ہے۔

کیبل ایسوسی ایشن کے ایک اور عہدیدار کیپٹن جبار نے بتایا کہ جیو چینل کیبل آپریٹروں کو ڈی ٹی ایچ کے ذریعے نشریات دینے کے لیے ڈیکوڈر کے عوض پیسے مانگ رہی ہے اور ہر معاملہ پر کیبل آپریٹروں کی مخالفت کرتی ہے۔ اس لیے کیبل آپریٹروں نے اس کے چینلوں کا بائیکاٹ کیا ہے۔

اس سے پہلے پمرا پاکستانی کیبل آپریٹروں پر مقبول بھارتی چینلوں سٹار پلس سمیت پینتیس چینلوں کو دکھانے پر پابندی لگا چکی ہے جس کے خلاف کیبل آپریٹروں نے ہڑتال کی دھمکی بھی دی تھی لیکن اسے موخر کردیا تھا۔

غیرملکی خصوصا بھارتی چینلوں پر پابندی کے بارے میں ایک رائے یہ ہے کہ اس کا مقصد اشتہاروں کے کاروبار کا رخ بھارتی چینلوں سے پاکستانی چینلوں کی طرف موڑنا ہے۔ تاہم عوام میں ان بھارتی چینلوں کی مانگ کی وجہ سے کیبل آپریٹروں کو مشکلات کا سامنا ہے۔

پیر کی رات لاہور میں آل پاکستان براڈ کاسٹرز ایسوسی ایشن اور کیبل آپریٹرز ایسوسی ایشن کے درمیان جیو کے چینلوں کے بائیکاٹ کے معاملہ پر مذاکرات ہوں گے۔