اعجاز مہر بی بی سی اردو ڈاٹ کام، اسلام آباد

	شہر میں جگہ جگہ پولیس کے ناکے لگے ہیں

شاہراہ دستور عام افراد اور ٹریفک کے لیے بند رکھنے کا فیصلہ کیا گیا ہے اور متبادل راستوں کے لیے انتظامیہ نے اخبارات میں اشتہارات شائع کیے ہیں۔

وفاقی وزارتوں کے دفاتر یعنی سیکریٹریٹ جانے کے لیے متبادل راستے کے طور پر مارگلہ روڈ استعمال کرنے کی ہدایت کی گئی ہے۔ تمام سرکاری ملازمین کو ہدایت کی گئی ہے کہ وہ سنیچر کی صبح آٹھ بجے سے پہلے دفاتر پہنچ جائیں بصورت دیگر راستے بند ہوجائیں گے۔

جمعہ کی سہ پہر سے اسلام آباد کا ہوائی اڈہ بند کرنے کا فیصلہ کیا گیا ہے اور ایئرپورٹ کے اندر اورگرد نواح میں سیکورٹی فورسز کی تعداد بڑھادی گئی ہے۔ سیکورٹی فورسز نے خصوصی کنٹرول روم بھی قائم کیے ہیں۔

ایس ایس پی اسلام آباد سکندر حیات نے بی بی سی کو بتایا کہ شکرپڑیاں اور مارگلہ کی پہاڑوں پر ایک سو بیس کے قریب خصوصی پولیس چوکیاں قائم کی گئی ہیں۔

	امریکی وفد کی آمد کے لیے ایک استقبالیہ بینر

شہر میں جگہ جگہ پولیس کے ناکے لگے ہیں اور مشکوک گاڑیوں کی تلاشی لی جارہی ہے جبکہ خفیہ کیمرے بھی نصب کیے گئے ہیں۔ مختلف جگہوں پر پولیس اہلکار ٹولیوں کی شکل میں موجود ہیں۔

اسلام آباد کے اوپر ہیلی کاپٹر بھی پرواز کرتے دیکھے گئے ہیں اور ایسا لگ رہا ہے کہ وہ فضائی نگرانی کا کام کر رہے ہیں۔ اسلام آباد کے تمام بڑے ہوٹل خالی کرائے گئے ہیں اور سفارتی علاقے کی طرف آنے والے راستوں پر رکاوٹیں کھڑی کی گئی ہیں۔

تاحال امریکی صدر جارج بش کی آمد اور روانگی کے اوقات کو حفاظتی اقدامات کے پیش نظر خفیہ رکھا گیا ہے۔ امکان ہے کہ دلی سے صدر بش جمعہ اور سنیچر کی درمیانی شب اسلام آباد پہنچیں گے۔ سیکورٹی حکام کا کہنا ہے امریکی صدر جارج بش کی آمد اور روانگی کے وقت موبائل فون سیسٹم کچھ دیر کے لیے بند کرنے پر غور کیا جارہا ہے۔