مبشر زیدی بی بی سی اردو ڈاٹ کام، اسلام آباد

	کالاباغ ڈیم پر تحفظات کو دور کیا جائے گا: شوکت عزیز

وفاقی وزیرِ اطلاعات شیخ رشید نے اسلام آباد میں وفاقی کابینہ کے اجلاس کے بعد بتایا کہ آج کابینہ کو آبی ذخائر کے بارے میں بریفنگ دی گئی جس کے بعد وزیرِ اعظم شوکت عزیز نے کہا کہ نئے آبی ذخائرکی ملک کو اشد ضرورت ہے اور ملکی معیشت کے لیے ریڑھ کی ہڈی کی حیثیت رکھنے والے شعبے زراعت کے لیے پانچ آبی ذخائر بھاشا، کالاباغ، منڈا، اکھوڑی اور کرمتنگی ڈیم سن دو ہزار سولہ تک بنائے جائیں گے۔

وزیرِاعظم شوکت عزیز نے کابینہ کو یہ یقین دہانی بھی کروائی کہ کالاباغ ڈیم پر تحفظات کو دور کیا جائے گا۔ وزیرِاعظم نے کابینہ کے اجلاس میں یہ بھی کہا کہ نئے آبی ذخائر کی تعمیر میں تیس سال کی تاخیر ہو چکی ہے۔

	کالاباغ ڈیم کے خلاف سندھ، بلوچستان اور سرحد میں مظاہرے ہوئے ہیں

وفاقی کابینہ نے باجوڑ میں ہونے والے مبینہ امریکی حملے کی بھی مذمت کی اور کہا کہ بےگناہ جانوں کا ضیاع افسوسناک ہے۔ کابینہ کے مطابق پاکستان دہشت گردی کے خلاف ہے مگر اپنی آزادی اور خودمختاری کا احترام بھی چاہتا ہے۔

ایک سوال پر شیخ رشید نے کہا کہ پاکستانی حکام سے باجوڑ حملے کے بارے میں کسی قسم کی معلومات یا انٹیلیجنس کا تبادلہ نہیں کیا گیا تھا۔ انہوں نے کہا کہ پاکستان اپنی سرحدوں کی حفاظت کرنا جانتا ہے۔