ریاض سہیل بی بی سی اردو ڈاٹ کام، کراچی

	چیف جسٹس نے کہا کہ اعلیٰ عدالتوں میں بھی اصلاحات لائی جا رہی ہیں

لاڑ کانہ میں جوڈیشنل کانفرنس کے بعد صحافیوں سے مختصر بات چیت کے دوران جب ان سے یہ سوال کیا گیا کہ کیا ماضی میں عدالتی ضمانت کی کوئی روایت رہی ہے تو پاکستان کے چیف جسٹس کا کہنا تھا کہ عدالت جو فیصلے جاری کرتی ہے۔ وہ جوڈیشنل گارنٹی ہوتے ہیں۔

واضح رہے کہ صدر پرویز مشرف کا کہنا ہے کہ کالاباغ ڈیم پر صوبے سندھ کو سپریم کورٹ سے گارنٹی دلوائی جائےگی۔

چیف جسٹس نے سندھ میں چار ججوں کی کرپشن کے الزام میں برطرفی کے فیصلے کو سراہا اور کہا کہ یہ اچھا فیصلہ ہے۔ اعلیٰ عدالتوں میں بھی اصلاحات لائی جا رہی ہیں۔

چیف جسٹس نے کہا کہ پتنگ بازی پر پورے ملک میں پابندی عائد کی گئی ہے۔ یہ بھی کوئی کھیل ہے جس میں اتنی انسانی جانیں ضائع ہوجاتی ہیں۔

سندھ میں عدالتی فیصلے کے باوجود ہونے والے جرگوں کے بارے میں سوال کے جواب میں جسٹس افتخار محمد چوہدری نے بتایا کہ معاملہ اگر عدالت کے نوٹس میں لایا جائےگا تو اس کو ضرور دیکھا جائےگا۔