عزیزاللہ خان بی بی سی اردو ڈاٹ کام، کوئٹہ

	عاصمہ کےمطابق وہاں بمباری ضرور ہوئی ہے

سبی کے راستے کاہان کی حدود تک دورہ کرنے کے بعد کوئٹہ واپس پہنچنے پر اخباری کانفرنس سے خطاب کرتے ہوئے عاصمہ جہانگیر نے کہا کہ حکومت کا دعویٰ ہے کہ سکیورٹی فورسز نے صرف مشتبہ افراد کے کیمپوں پر حملے کیے ہیں جبکہ قبائلی رہنماوں کا کہنا ہے کہ وہاں کوئی کیمپ نہیں ہیں اور شہری آبادی میں حملے کیے گئے ہیں جس میں ستر کے قریب لوگ ہلاک ہوئے ہیں۔

انہوں نے کہا ہے کہ وہ اس اصل مقام تک تو نہیں پہنچ سکیں لیکن اس سے کوئی انکار نہیں کر سکتا کہ وہاں بمباری ضرور ہوئی ہے۔

عاصمہ نے کہا کہ انسانی حقوق کی خلاف ورزی تو پاکستان بھر میں ہو رہی ہے لیکن یہاں بلوچستان میں اس کو نوعیت مختلف ہے یہاں تشدد بھی کیا جا رہا ہے۔

گزشتہ روز عاصمہ جہانگیر نے تلی سے کاہان اور پھر کاہان سے کوہلو کے راستے رکھنی اور ڈیرہ غازی تک سڑک کی تعمیر کو تنازعہ کی وجہ بتائی تھی لیکن اس حوالے سے کوہلو کے ضلعی ناظم انجینیئر علی گل مری نے کہا ہے کون کمبخت ترقی نہیں چاہتا۔ اس سڑک کی تعمیر کے لیے انہوں نے خود مشینری بھجوائی تھی اور کام ہورہا تھا کہ اچانک فورسز نے حملے شروع کر دیے جس وجہ سے مزدور کام چھوڑ کر چلے گئے۔

انہوں نے کہا کہ صدر پرویز مشرف کے دورے کے لیے جو سپاسنامہ انہوں نے تیار کیا تھااس میں سڑکوں کی تعمیر سکولوں کا قیام اور سکولوں کے لیے بسوں کا مطالبہ بھی شامل کرنا تھا لیکن وہ یہ سپاسنامہ پیش نہیں کر سکے۔

ان کے مطابق سپاسنامہ انہوں نے اس لیے پیش نہیں کیا کیونکہ انہیں یہ خدشہ تھا کہ صدر پرویز مشرف اس دورے کے دوران کوہلو میں چھاؤنی کے قیام کا اعلان کریں گے جس پر انھوں نے ساتھیوں کے مشورے سے اس تقریب میں شرکت ہی نہیں کی۔

علی گل نے کہا کہ اس فوجی کارروائی کے لیے ضلعی انتظامیہ کو بتایا بھی نہیں گیا اور انہیں بھی ذہنی تشدد کا نشانہ بنایا گیا ہے۔

مبصرین کا کہنا ہے کہ کوہلو میں فوجی کارروائی کا اصل مقصد یہاں فوجی چھاؤنی کا قیام ہے اور اس علاقے کے تیل اور گیس کے ذخائر نکالنا ہے۔

قوم پرست جماعتوں کے قائدین کا کہنا ہے کہ حکومت ان علاقوں میں ہی چھاؤنیاں کیوں بنا رہی ہے جہاں تیل اور گیس کے ذخائر ہیں اور یا ساحل ہیں۔