عزیزاللہ خان بی بی سی اردو ڈاٹ کام، کوئٹہ

	جنرل مشرف ان دنوں بلوچستان کے دورے پر ہیں۔

بلوچستان میں مجلس عمل اور مسلم لیگ کی مخلوط حکومت قائم ہے لیکن منگل کو گورنر ہاؤس میں صدر کے خطاب کے لیے مدعو کیے گئے تمام افراد کو ایک قطار میں کھڑا کر کے ان کی جامہ تلاشی لی گئی ان میں وزراء، اراکین اسمبلی، سینیٹرز اور علاقے کے معززین شامل تھے۔

مجلس عمل سے تعلق رکھنے والے صوبائی وزیر صحت حافظ حمداللہ اور صوبائی وزیر بلدیات حافظ حسین احمد شرودی نے کہا ہے کہ قطار میں کھڑا ہونا اور جامہ تلاشی دینا ان کے عہدے اور وقار کے منافی تھا اس لیے مجلس عمل کےساتھیوں نے وہاں مشورہ کرکے اس تقریب کا بائیکاٹ کیا ہے۔

حافظ حمداللہ نے کہا ہے کہ انہوں نے سنت کے مطابق دعوت نامہ قبول کیا تھا لیکن اس سلوک کی انہیں توقع نہیں تھی۔

صدر پرویز مشرف ان دنوں بلوچستان کے دورے پر ہیں لیکن ان کی تقریبات میں کوئٹہ کے صحافیوں کو شرکت کی اجازت نہیں دی جارہی۔ آج گورنر ہاؤس میں بھی صحافیوں کی ایک بڑی تعداد شرکت نہیں کر سکی۔ پیر کے روز تو صدر کے دورے کو شام تک خفیہ رکھنے کی کوشش کی گئی۔ کوئٹہ میں سخت حفاظتی اقدامات کیے گئے ہیں عام شہریوں کے لیے چھاؤنی کے علاقے میں داخلہ مزید مشکل بنا دیا گیا ہے۔

یہاں یہ اطلاعات بھی موصول ہوئی ہیں کہ صدر پرویز مشرف کل کوہلو جائیں گے جہاں ان کے خطاب میں شرکت کے لیے نواب خیر بخش مری کے بیٹے اور رکن صوبائی اسمبلی بالاچ مری کو بھی دعوت دی گئی ہے لیکن انہوں نے کہا ہے کہ وہ اس تقریب میں شرکت نہیں کریں گے۔