مبشر زیدی بی بی سی اردو ڈاٹ کام، اسلام آباد

	جیلوں میں کوڑے عدالت کے حکم پر مارے جاتے تھے لیکن اب ایسے حکم نہیں دیے جاتے ‘

وفاقی وزیر داخلہ آفتاب شیرپاؤ نے بی بی سی سے بات کرتے ہوئے کہا کہ ماضی میں جیل کے اندر قیدیوں کو سزا کے طور پر کوڑے مارے جاتے تھے اور اب چاروں صوبوں اور وفاقی حکومت نے اس سزا کو ختم کر دیا ہے۔

راولپنڈی کی اڈیالہ جیل کے ڈپٹی سپرنٹنڈنٹ ملک طاہر نے بتایا کہ جیلوں میں کوڑے مارنے کی روایت متروک ہو چکی ہے۔ ان کا کہنا تھا کہ جیلوں میں کوڑے عدالت کے حکم پر مارے جاتے تھے اور اب عدالتوں نے اس طرح کے حکم دینے بند کر دیے ہیں۔

پاکستان میں کوڑے مارنے کی روایت جنرل ضیاالحق کے دور میں شروع ہوئی تھی۔ ان کے گیارہ سالہ دور حکومت میں درجنوں افراد کو سر عام کوڑے لگائے گئے تھے جن میں چار صحافی بھی شامل تھے۔

ان کے دور کے بعد سابق وزرا اعظم بینظیر بھٹو اور نواز شریف کے دور میں سر عام کوڑے تو نہیں لگائے گئے مگر جیلوں کے اندر عدالت کے حکم پر کوڑے لگانے کا رواج تھا۔

وفاقی وزیر داخلہ کے مطابق حکومت جیلوں کے نظام کو بہتر بنانے کے لیے منصوبہ بندی کر رہی ہے تاکہ قیدی جیل سے ایک امن پسند شہری بن کر باہر نکلیں۔

ان کا کہنا تھا کہ جیلوں میں قید خواتین اور بچوں کے لیے مفت قانونی مدد کے بارے میں بھی غور کیا جا رہا ہے اور اس بارے میں چاروں صوبوں کو ہدایات جاری کی گئی ہیں کہ وہ جیلوں میں قید خواتین اور بچوں کے لیے مفت قانونی مدد فراہم کرنے کے بارے میں ریٹائرڈ ججوں اور غیر سرکاری تنظیموں کی مدد حاصل کریں۔

پاکستان کے صوبہ پنجاب میں تیس جیلیں ہیں جن میں سترہ ہزار قیدیوں کی گنجائش ہے مگر ان میں ترپن ہزار سے زائد قیدیوں کو رکھا گیا ہے

اسی طرح صوبہ سندہ میں انیس جیلیں ہیں جن میں آٹھ ہزار قیدیوں کی گنجائش ہے مگر ان میں تقریباً بیس ہزار قیدی موجود ہیں۔ بلوچستان کی دس جیلوں میں اٹھارہ سو قیدیوں کی جگہ بیس ہزار قیدیوں کو رکھا گیا ہے۔ صوبہ سرحد کی بائیس جیلوں میں بھی گنجائش سے زیادہ قیدی موجود ہیں۔