علی سلمان بی بی سی اردو ڈاٹ کام لاہور

	پنجاب میں ہر سال دشمنی کی وجہ سےسینکڑوں افراد کو قتل کر دیا جاتا ہے۔

پولیس کے مطابق شاہ نور سٹوڈیو سے ایک کلومیٹر دور ملتان روڈ پر ایک چلتی کار پر فائرنگ کی گئی۔ کار بجلی کے کھمبے سے ٹکرا کر رک گئی۔ فائرنگ سے کارمیں سوار تین افراد موقع پر ہلاک ہوگئے جبکہ دو افراد ہسپتال پہنچ کر دم توڑ گئے۔

ہلاک ہونے والوں میں لاہور کے شمال میں واقع قصبے شکرگڑھ کی ایک یونین کونسل کے ناظم چودھری افضل بھی شامل ہیں۔ دیگر ہلاک ہونے والوں میں کار کا ڈرائیور شاہد، ظفر خان،عبدالرؤف اور مقبول شامل ہیں۔ حملہ آوروں کی فائرنگ کی زد میں آ کر دو راہ گیر بھی زخمی ہوگئے۔

لاہور کے شعبہ تفتیش کے سینئر سپرنٹنڈنٹ پولیس چوہدری شفقات احمد نے کہا ہے کہ بظاہر قتل کی واردات دیرینہ دشمنی کا شاخسانہ معلوم ہوتی ہے اور پولیس کی ایک ٹیم شکرگڑھ روانہ کر دی گئی ہے۔

پنجاب میں ہر سال دیرینہ دشمنی کی بنیاد پر سینکڑوں افراد کو قتل کر دیا جاتا ہے۔