اعجاز مہر
بی بی سی اردو ڈٹ کام، بالا کوٹ |  |
| | | زلزلے کے متاثرین دعاء کرتے ہوئے |
زلزلے سے متاثرہ علاقوں میں مذہبی تنظیموں نے اب امدادی کاموں کے ساتھ ساتھ اپنے عقائد کے مطابق تبلیغ شروع کردی ہے اور ان کا زلزلہ زدگان پر زور ہے کہ وہ مکانوں کے ساتھ ساتھ مساجد بھی تعمیر کریں۔ اس بات میں کوئی شک نہیں کہ مذہبی تنظیموں نے آٹھ اکتوبر کے زلزلے کے فوری بعد بڑے منظم انداز میں امدادی کام کیے اور بعض پابندی عائد کردہ اور زیرنگرانی جہادی تنظیموں کے ’مجاہدین‘ نے انتہائی دشوار گزار پہاڑی راستوں سے پھنسے ہوئے لوگوں کو امداد پہنچائی۔ لیکن اب چھ ہفتے گزر جانے کے بعد ان تنظیموں کا زور اسلام کی اپنے اپنے مکاتب فکر کے مطابق تبلیغ کرنے پر ہے تاکہ وہ زیادہ زیادہ اپنے ہم خیال پیدا کرسکیں۔ بالا کوٹ شہر میں زمیں بوس تھانے کے قریب سڑک کنارے واقع الرشید ٹرسٹ کا کیمپ ہے۔ اس کیمپ میں روزانہ صبح کے وقت وعظ ہوتا ہے۔ مذہبی تنظیموں کے علماء باضابطہ طور پر تقریریں کرتے ہیں اور لوگوں کو ترغیب دیتے ہیں کہ وہ دنیا سے زیادہ آخرت کی فکر کریں۔ الرشید ٹرسٹ کے وعظ کرنے والوں نے کہا: ’مسلمانوں، دیکھو تمہارے باپ داداؤں نے جو مکان بنائے تھے وہ پلک جھپک میں تباہ ہوگئے اور اس میں بھی خدا کی کوئی بھلائی ہوگی۔‘ ایک موقع پر ایک خطیب نے کہا کہ ’آپ کو اپنے مکان بنانے کی فکر تو ہے لیکن کیا کسی کو مساجد بنانے کی بھی کوئی فکر ہے؟‘ ان کے مطابق اللہ لوگ تعالیٰ کے عذاب یعنی زلزلے سے سبق سیکھیں اور مستقبل کے عذاب سے بچنے کے لیے مساجد کی تعمیر سمیت دینی کاموں کے لیے جانی اور مالی صدقہ دیں۔ جماعت اسلامی کی الخدمت ٹرسٹ ہو یا جماعتِ دعوۃ، ان کے کیمپوں میں جہاں وعظ ہوتے ہیں وہاں دینی تعلیم کا اہتمام بھی کیا گیا ہے۔ ان تنظیموں کے رضا کاروں کا متاثرین پر زور ہے کہ وہ پابندی کے ساتھ پانچ وقت کی نماز کے ساتھ ساتھ اپنے بچوں کو پابندی کے ساتھ قرآنی تعلیمات بھی دیں تاکہ وہ اپنی آخرت بہتر کر سکیں۔ ایک سکاؤٹس رضاکار نے، جو الرشید ٹرسٹ کے قریب ایک اور کیمپ کے قریب کھڑے تھے، کہا کہ وہ بھی مسلمان ہیں لیکن اس مصیبت کی گھڑی میں رفاحی کاموں کو اپنے سیاسی یا مذہبی مقاصد کے لیے استعمال نہیں کرنا چاہیے۔ | 
جستی چادروں کے گھر
