علی سلمان بی بی سی اردو ڈاٹ کام لاہور

	عمران خان امدادی قرضوں کو پاکستان کے لیے ایک بڑا مالیاتی جال قرار دیتے ہیں

وہ بدھ کو لاہور میں اپنی پارٹی کے دفتر میں ایک پریس کانفرنس سے خطاب کر رہے تھے۔

انہوں نے کہا کہ یہ اعلان شدہ چار ارب ڈالراس ملک پر قرضے کی صورت میں چڑھیں گے ان کا کہنا تھا کہ بے شک یہ نرم شرائط پر مل رہے ہیں لیکن ہیں تو قرضے ہی۔

انہوں نے کہا کہ ماضی میں انہوں نے اپنےزیرانتظام ہسپتال کے لیے بیرون ملک سے نرم شرائط پر قرض لیا تھا جس کا مارک اپ اگرچہ صرف ایک فی صد تھا لیکن وہ انہیں اتنا مہنگا پڑا کہ اس نے ان (ہسپتال)کی کمر ہی توڑ دی کیونکہ جیسے جیسے روپے کی قیمت گرتی تھی قرض بڑھتا چلا جاتا تھا۔

انہوں نے موجودہ امدادی قرضے کو پاکستان کے لیے ایک بڑا مالیاتی جال قرار دیا اور کہا کہ ان قرضوں کا بوجھ عوام پر ڈالا جائےگا اور اسے اتارنے کے لیے بالواسطہ ٹیکس لگائے جائیں گے اور مہنگائی بڑھے گی۔

عمران خان نے کہا کہ ایک طرف حکومت قرض اتارنے کا دعوی کرتی ہے تو دوسری طرف مزید قرضے لیے جارہے ہیں۔

انہوں نے امدادی رقوم کی تقسیم کے حوالے سے بھی اپنے تحفظات کا اظہار کیا اور کہا کہ وہ ان رقوم کا غیر جانبدارانہ احتساب چاہتے ہیں جس کے لیے غیر جانبدار اکاؤنٹنٹ اور آڈیٹر مقرر کرنے چاہیے۔

عمران خان نے کہا کہ انہیں صدر مشرف اور ان کی ٹیم پر ذرہ برابر بھی اعتماد نہیں ہے کیونکہ ان کے بقول صدر مشرف نے وردی اتارنے کا وعدہ پورا نہ کر کے اور واشنگٹن پوسٹ کو انٹرویو دینے کے بعد اس سے انکار کرکے اپنی ساکھ کو متاثر کر لیا ہے۔

پاکستان کرکٹ ٹیم کے سابق کپتان عمران خان نے کہا کہ حکومت کو یہ قرض لینے کی بجائے اپنے غیر ضروری اخراجات کم کرنے چاہیے۔

انہوں نے فوج کے لیے نئے جی ایچ کیو کی تعمیر پر اعتراض کیا اور یہ سوال اٹھایا کہ کیا ان حالات میں قوم کو اتنی بھاری رقم سےایک نئے جی ایچ کیو کی ضرورت ہے یا پھر اس بات کی ضرورت ہے کہ اس قوم کے بچوں کو مستقبل کے قرضے سے بچایا جائے؟

	اسلام آباد میں ہونے والی ڈونر کانفرنس جس میں قرضوں کی پیشکش کی گئی

عمران خان نے حکومت کے وزراء کی بڑی تعداد اور نئی گاڑیوں کی خرید کے معاملے کو بھی تنقید کا نشانہ بنایا اور کہا کہ حکومت اپنے غیر ضروری اخرجات کم کرنے کو تیار نہیں ہے اور عوام پرمزید قرضوں کا بوجھ ڈالا جارہاہے۔

انہوں نے امدادی رقوم اور سامان کی تقسیم کے لیے پارلیمانی کمیٹی کو بھی غیرملکی امدادی اداروں کو خوش کرنے کا ایک ڈھونگ قرار دیا اور کہا کہ حکومت اگر اس معاملے میں مخلص ہوتی تو اسے شروع سے ہی اراکین پارلیمان کو اعتماد میں لے لینا چاہیے تھا۔

عمران خان نے کہا کہ وہ خود کئی متاثرہ علاقوں کا دورہ کر کے آئے ہیں ان کے بقول ان علاقوں میں غیر سرکاری تنظیمیں اور اداروں نے بہت کام کیا ہے جبکہ سب سے کم کام حکومت نے کیا ہے۔
انہوں نے ٹی وی پر دکھائی جانے والی کوریج کے لحاظ سے حکومت نے سب سے زیادہ کام کیا اور حقیقت کے مطابق حکومت نے سب سے کم کام کیا ہے۔

انہوں نے اپنے جس دفتر میں پریس کانفرنس کی وہاں ٹین اور لکڑی کے گھروں کے نمونے رکھے تھے انہوں نے بتایا کہ ان کی تنظیم نے اس طرز کے سو مکانات بنا دیے ہیں اور مزید سو جلد متاثرہ علاقوں میں پہنچا دیے جائیں گے۔

عمران خان بدھ کو ہی امریکا کے پانچ روزہ دورے سے لوٹے تھے انہوں نے بتایا کہ اس دوران انہوں نے پانچ لاکھ ڈالر کی امداد بھی اکٹھا کی ہے۔