ندیم سعید بی بی سی اردو ڈاٹ کام، بالا کوٹ

	بچوں کو متاثرین کے مختلف کیمپوں سے صبح سات بجے لایا گیا تھا

بچوں کو زلزلہ کے متاثرین کے لیے بنائے گئے مختلف کیمپوں سے صبح سات بجے لایا گیا تھا کہ صدر مشرف یا ان کی اہلیہ بچوں کو عید کے تحائف پیش کرینگے اور اس حوالے سے پاکستان کے سرکاری اور نجی ٹی وی چینلز کے لوگ بھی اپنے اپنے سازوسامان کے ساتھ اس ’ اہم ‘ موقع کو سامعین تک براہ راست پہنچانے کے لیےمستعد کھڑے تھے۔

پاکستان کے سرکاری ٹی وی پر کافی عرصہ بچوں میں ایک ڈرامہ سیریز ’عینک والا جن‘ مقبول رہی۔ اس سیریز کے اداکار بالا کوٹ بلائے گئے تھے اور خیال تھا کہ صدر اور ان کی اہلیہ خیمہ سکول میں بچوں کے ساتھ ان کی پرفارمنس دیکھیں گے۔

فوج کے کئی جوان دن بھر بچوں کو قابو کرنے میں مصروف رہے لیکن بچے تھے کے تھوڑی تھوڑی دیر بعد خیموں میں قائم اپنے کلاس رومز سے نکل آتے۔ دن کے بارہ بجے کے قریب بچوں کو بھوک نے ستانا شروع کیا تو فوجی ان میں سے کچھ کو قریب ہی واقع اپنے کیمپ میں لے گئے اور تھوڑا بہت کھانا کھلایا۔

	بچوں کے لیے ڈرامے کا انتظام کیا گیا جو صدر مشرف کے جانے کے بعد دکھایا گیا

یاد رہے کہ ایک غیر سرکاری تنظیم پتن کی طرف سے قائم ایک خیمہ بستی میں گزشتہ منگل کو اٹھارہ سالہ رفعت اور چھبیس سالہ ابرار شاہ کی شادی انجام پائی تھی۔ صدر نے دلہن کو جیولری کا ایک سیٹ اور دلہا کو کپڑے اور سلامی میں پانچ ہزار روپے دیے۔نیک تمناؤں کا اظہار کیا اور چل دیے۔

صدر نو بیاہتا جوڑے کو مبارکباد دینے کے لیےآتے جاتے خیمہ سکول کے پاس سے گزرے لیکن صبح سے منتظر رکھے گئے بچوں کو ملے بغیر چلے گئے۔ جاتے جاتے صحافیوں کے یاد دلانے پر صدر نے فی بچہ دو دو ہزار روپے عیدی کا اعلان کر دیا۔

	صدر مشرف اورر ان کی اہلیہ صرف اس نو بیاہتہ جوڑے کے خیمے ہی میں گئے

صدارتی جوڑے کے جانے کے بعد بچوں کو ’عینک والا جن‘ ڈرامہ دکھایا گیا لیکن وہ تمام تحائف جو صدر مشرف یا ان کی اہلیہ نے بچوں میں تقسیم کرنے تھے فوجی گاڑی میں واپس روانہ کر دیے گئے۔