عدنان عادل بی بی سی اردو ڈاٹ کام، لاہور

	تمام فیکٹریاں حکومت کو خیمے ایسوسی ایشن کے ذریعے مہیا کر رہی ہیں

خیمہ ایسوسی ایشن کے وائس چئرمین کا کہنا ہے کہ پنجاب میں خیمے اور ترپالیں بنانے کے سینتالیس کارخانے ہیں کئی دن سے روزانہ تیرہ ہزار سے پندرہ ہزار خیمے بمع ترپالوں کے تیار کر کے حکومت کو مہیا کر رہے ہیں۔ ترپالیں خیموں میں زمین پر بچھانے کے لیے ہیں۔

ایسوسی ایشن کے مطابق حکومت سے ایک خیمہ بمع ترپال کی قیمت چھ ہزار دو سو روپے طے ہوئی ہے اور تمام فیکٹریاں حکومت کو خیمے ایسوسی ایشن کے ذریعے مہیا کر رہی ہیں۔

ایسوسی ایشن کے وائس چئرمین کے مطابق حکومت نے زلزلہ زدگان کے لیے ان خیموں پر سے انکم ٹیکس، سیلز ٹیکس، سوشل سیکیورٹی چارجز، اولڈ ایج بینی فٹ چارجز وغیرہ معاف کردیے ہیں اورمحکمہ محنت کو خیمہ فیکٹریوں سے دور رہنے کی ہدایت کردی ہے۔

حکومت پنجاب کی جانب سے بدھ کو اخباروں میں ایک اشتہار شائع ہوا ہے۔ اس اشتہار میں محکمہ صنعت کی جانب سے خیمے تیار کرنے والی فیکٹریوں کو انتباہ کیا گیا ہے کہ وہ اپنے خیمے ملکی اور غیر ملکی اداروں کو فروخت نہیں کرسکتے اور اگر انہوں نے ایسا کیا تو ان کے خلاف تادیبی کارروائی کی جائے گی۔یہ پابندی فی الحال ایک ماہ کےلیے لگائی گئی ہے۔

	حکومت سے ایک خیمہ بمع ترپال کی قیمت چھ ہزار دو سو روپے طے ہوئی ہے

خیمہ مینوفیکچررز ایسوسی ایشن کے مطابق پنجاب کی فیکٹریاں این جی اوز اور اقوام متحدہ کے ادارہ یو این سی آر کو خیمہ مہیا کررہی تھیں لیکن اب ایسا نہیں کررہیں۔ ایسوسی ایشن کے وائس چئرمین کاکہنا ہے کہ اس پابندی کا مقصد یہ ہے کہ یہ غیرسرکاری ادارے خیمے دوسرے ملکوں سے لے کر آئیں۔

انہوں نے کہا کہ چین میں پچاس ہزار خیمے دستیاب ہیں اسی طرح بھارت میں خیمے دستیاب ہیں اس لیے ان این جی اوز کو یہ خیمے ان ملکوں سے لینے چاہییں تاکہ پاکستان کے کارخانے ملک کی ہنگامی ضرورت کو زیادہ سے زیادہ پورا کرسکیں۔

	پاکستانی خیمہ ساز ملکی اور غیر ملکی اداروں کو خیمے فروخت نہیں کرسکتے

حاجی اکبر نے کہا حکومت تمام خیموں کو خیمہ ساز فیکٹریوں کی ایسوسی ایشن کے ذریعے خریدنا چاہتی ہے لیکن ابھی ایسوسی ایشن اور حکومت کے درمیان خیموں کی قیمت پر تنازعہ چل رہا ہے۔ انہوں نے کہا کہ حکومت جس نرخ پر خیمے لینا چاہتی ہے وہ مارکیٹ کے ریٹ سے کم ہے جبکہ اس دوران میں جس کپڑے سے خیمے تیار ہو رہے ہیں اس کی قیمت دوگنا ہو چکی ہے۔

شیخ نورالدین اینڈ سنز کے منیجر کا کہنا ہے کہ چونکہ حکومت فیکٹریوں کو کم نرخ پر خیمہ دینے کا پابند کررہی ہے اس لیے فیکٹریاں زیادہ خیمے نہیں بنائیں گی کیونکہ اس سے ان کا نقصان بڑھ جائے گا۔