علی سلمان بی بی سی اردو ڈاٹ کام، مظفر آباد

	زلزلے کے بعداس علاقےمیں سفر مشکل اور خطرناک ہوچکا ہے

راولپنڈی کے عاشق حسین لودھی زلزلے کے دوسرے دن سے ہی متاثرہ علاقوں میں مسلسل امداد پہنچا رہے ہیں۔

انہی کے ساتھ میں نے مظفر آباد تک کا ایک سفر کیا۔ انہیں راستے میں ہاتھ دے کر روکا تو انہوں نے خوشدلی سے بٹھا لیا اور ٹرک کے انجن کی گھن گرج میں ان سے گفتگو کا آغاز ہوا۔

عاشق حسین نے بتایا کہ زلزلے کے بعد ان علاقوں میں گاڑیوں کا سفر کوئی آسان کام نہیں تھا۔ خاص طور پر دیر کٹ کے راستے میں جگہ جگہ سے سڑک ٹوٹ کر کھائی میں جا گری تھی اور کئی مقامات ایسے تھے جہاں بظاہر سڑک کی تہہ تھی لیکن نیچے سے خلا اور کھائی تھی۔ انہوں نے بتایا کہ انہوں نے ایک ویگن سمیت تین گاڑیاں ایسی کھائیوں میں گری دیکھی تھیں۔

لوگوں کو علم نہیں کہ کیا بھیجنا ہے اور کیا نہیں بھیجنا لوگ گرمیوں میں استعمال والے کپڑے بھیج دیتے ہیں جو یہاں بے کار ہیں عاشق لودھی

کوہالہ کے نزدیک انہوں نے ٹرک روک کر روزہ افطار کیا۔چند کھجوریں،دو تین پکوڑے اور آدھ درجن خربوزے کی پھانکیں بس یہی کچھ ان کی افطاری رہی۔

اسی دوران ایک بچہ ان سے کمبل مانگنے آگیاعاشق حسین نے اسے انکار کر دیا اور وجہ یہ بتائی کہ یہ متاثرہ علاقہ نہیں ہے اور وہ امدادی سامان ضائع نہیں کر سکتے۔

دوبارہ سفر شروع ہوا تو انہوں نے کچھ دیر اونچی آواز میں عطاءاللہ عیسی خیلوی کے گانے بھی لگائے رکھے۔ ان کا کہنا تھا کہ انہیں متاثرین کے دکھ کا احساس ہے لیکن جب وہ طویل ڈرائیونگ سے اکتا جاتے ہیں تو پھر گانے سن لیتےہیں۔

راستے میں خچروں کا ایک ریوڑ گزرا تو انہوں نے غصے میں کہا کہ یہ اسے یہاں لےکر پھر رہے ہیں جبکہ ان کی اصل ضرورت متاثرہ علاقوں میں ہے۔ انہوں نے کہاکہ ٹرکوں نے بہت سامان پہنچا دیا ہے اور اب اس سامان کو پہاڑوں کے اوپر پہنچانے کی ضرورت ہے جو خچروں کے ذریعے پہنچایا جا سکتا ہے۔

گفتگو کے دوران ٹرک ڈرائیور عاشق حسین نے کہا کہ زلزلے کے بعد یہاں سفر واقعی مشکل اور خطرناک ہوچکا ہے اور پنجاب سےامدادی سامان لےکر آنے والے کئی لوگ گھبرا بھی جاتےہیں لیکن ان کے ساتھ آنے والے کسی شخص نے بھی اپنا سفر ڈر کی وجہ سے ترک نہیں کیا۔

	ٹرک ڈرائیور عاشق لودھی

عاشق حسین لودھی نے کہا کہ سڑکوں پر امدادی ٹرکوں کی تعداد کچھ کم ہوئی ہے لیکن اب ذرا ضرورت کے مطابق سامان آنے لگا ہے۔ انہوں نے بتایا کہ اب اصل مسئلہ سامان ان علاقوں تک پہنچانے کا ہے جہاں گاڑیاں نہیں جا سکتیں۔

ان کا کہنا تھا کہ امدادی سامان ضائع بھی ہو رہا ہے۔ خاص طور پر جو لوگ انفرادی طور پر سامان لاتے ہیں وہ سڑک کے کنارے سامان پھینک کر چلے جاتے ہیں جبکہ بعض ذرا ہوشمندی دکھاتے ہوئے کیمپوں کے حوالے کر دیتے ہیں۔

انہوں نے کہا کہ ایک تو لوگوں کو علم نہیں کہ کیا بھیجنا ہے اور کیا نہیں بھیجنا لوگ گرمیوں میں استعمال والے کپڑے بھیج دیتے ہیں جو یہاں بے کار ہیں۔

انہوں نے بتایا کہ شروع شروع میں کئی مقامات پر لوگوں نے ان کے ٹرک کو لوٹنے کی کوشش بھی کی۔ ٹرک کے ٹائر کی ہوا نکالی اور شیشے توڑ ڈالے لیکن پولیس اور فوج کی مداخلت پر وہ لوگ منتشر ہوگئے۔

پنجاب پولیس کی بھی بڑی نفری سڑکوں پر نظر آتی ہے لیکن ان کے بقول ایک فرق ضرور ہے اور وہ یہ کہ ان دنوں ٹرکوں کو روک کر ان سے رشوت وصول نہیں کی جارہی۔ عاشق لودھی

سفر کے دوران ملک بھر سے آئے ٹرک دکھائی دیے۔ سیاسی، غیر سیاسی تنظیموں، سرکاری اداروں، فوجی ٹرکوں کے علاوہ عام لوگ بھی سامان بھر بھر کر لے جا رہے تھے اور ٹرکوں پر لگے بینر ان کے بھیجنے والوں کا پتہ دیتے تھے۔

فوج کے ٹرکوں پر منظم انداز میں سامان بھرا دکھائی دیا۔ایک ٹرک پر خیمے لدے تھے اور دوٹرکوں پر صرف مٹی کے تیل کے چولہے تھے۔ دعوت اسلامی کے ٹرک میں سامان تھوڑا تھا لیکن دس پندہ سبز پگڑی والے اللہ ہو، اللہ ہو کا ورد کرتے جا رہے تھے۔

مظفرآباد کے علاقے میں موٹر وے پولیس کی گاڑی کی طرف اشارہ کر کے انہوں نے کہا کہ پنجاب پولیس کی بھی بڑی نفری سڑکوں پر نظر آتی ہے لیکن ان کے بقول ایک فرق ضرور ہے اور وہ یہ کہ ان دنوں ٹرکوں کو روک کر ان سے رشوت وصول نہیں کی جارہی۔

عاشق حسین کوموبائل فون پر بتایا گیا کہ انہیں یہ سامان سہیلی سکول میں اتروانا ہے۔ سہیلی سکول کے نزدیک ٹرک کھڑا کرنے کے دوران چند افراد نے ان کے ٹرک کو گھیرے میں لیکر سامان مانگا لیکن انہوں نے سارا سامان ریلیف کیمپ کی انتظامیہ کے حوالے ہی کیا۔