ریاض سہیل بی بی سی اردو ڈاٹ کام،کراچی

کارٹن چیک کیے گئے تو ان میں موجود گوشت کو استعمال کرنے کی مدت گزر چکی تھی

ریڈی میٹ فروخت کرنے والی کمپنی کے خلاف مقدمہ درج کردیا گیا ہے۔

کراچی سائٹ ایسوسیشن کو ہاشمی کین کمپنی کی جانب سے ریڈی میٹ کے ساڑھ چار سو کارٹن عطیے میں فراہم کیے گئے تھے۔

سائٹ پولیس کے سب انسپیکٹر شمس الزمان نے بی بی سی کو بتایا کہ جب ایسوسی ایشن نے یہ کارٹن چیک کیے تو ان میں موجود گوشت کی مدت گزر چکی تھی۔ ان ڈبوں پر استعمال کی آخری تاریخ اکتوبر دو ہزار دو درج تھی۔ پولیس کے مطابق کارٹن میں پندرہ ہزار کین تھے۔ ایک کین میں پانچ سے چھ افراد کی خوراک جتنا گوشت موجود ہوتا ہے۔
سائٹ پولیس کا کہنا ہے کہ یہ گوشت زلزلے زدگان کے لیے بھیجا جانا تھا۔
ایکسپائر گوشت فراہم کرنے پر ایسوسی ایشن کے سیکریٹری آصف جہانگیر کی جانب سے کنگز میٹ بنانے والی ہاشمی کمپنی کے مالکان کے خلاف فراڈ کا مقدمہ درج کرایا گیا ہے۔ مقدمے میں کسی کا نام نہیں دیا گیا ہے۔

پولیس حکام کے مطابق مزید تفتیش انویسٹیگیشن پولیس کرے گی اگر ضرورت ہوئی تو گرفتاری بھی عمل میں لائی جائیگی۔