شاہ زیب جیلانی، ذوالفقار علی بی بی سی اردو سروس مظفر آباد

اسلام آباد لے جائے جانے کی منتظر

مظفر آباد میں دن نکلنے کے ساتھ اسلام آباد سے ہیلی کاپٹر آنا شروع ہو گئے۔ اس کے علاوہ وہاں فوج کی بھاری نفری موجود ہے اور بڑے پیمانے پر امداد پہنچ رہی ہے۔

یہ درست ہے کہ یہ کارروائیاں پہلے سست تھیں اور اب ان میں تیزی آئی ہے۔ لیکن اصل مسئلہ امدادی سامان کی غیر منظم تقسیم کا ہے جو عام طور پر گاڑیوں سے پھینکا جاتا ہے اور انہیں حاصل کرنے میں کمزور لوگ پیچھے رہ جاتے ہیں۔

اس کے علاوہ کسی حد تک خیمے، ادوایات اور کمبل نہ ملنے کی شکایت بھی دور ہوئی ہے لیکن اب بھی شہری علاقوں میں بہت سارے لوگ اس بارے میں شکایت کرتے ہیں۔

اس مسئلے میں بھی زیادہ تر شکایات دیہاتی علاقوں سے آ رہی ہیں جہاں لوگ بہت پریشان ہیں۔

مظفر آباد میں امدادی کارروائی کے ذمہ دار سلیم محمود نے بی بی سی کو بتایا کہ ایک دو روز میں تمام زندہ افراد کا پتہ چلانے کے بعد ہلاک ہو جانے والوں کی لاشوں کی تلاش کا کام مکمل کیا جائے گا۔

کشمیر سے بہت سے لوگوں کے اسلام آباد اور راولپنڈی جانے کی بھی اطلاعات ملی ہیں۔ امداد کی تقسیم کے بارے میں تحفظات کے پیش نظر یہ لوگ یہاں سے جا رہے ہیں۔

کچھ سپاہیوں نے اپنا نام نہ بتانے کی شرط پر بی بی سی کو بتایا کہ امداد کی تقسیم پر با اثر لوگ اثر انداز ہو رہے ہیں جن میں سیاستدان اور دیگر افسران شامل ہیں۔

لائن آف کنٹرول پر بھارتی فوجیوں کے پاکستانی فوج کی بنکروں کی بحالی میں مدد کے بارے میں ایک سوال کے جواب میں شاہ زیب جیلانی نے بتایا کہ مظفر آباد میں کسی کو اس بات کا علم نہیں۔ انہوں نے کہا کہ کچھ فوجیوں سے اس بارے میں بات ہوئی لیکن ان کو کسی ایسی پیش رفت کا وہم و گمان بھی نہیں۔

بہت ہی مقامی سطح پر فوجیوں نے ایک دوسری کی مدد کی جو اتنی انہونی بات نہیں ہے اور ماضی میں بھی ایسی اطلاعات آتی رہی ہیں۔ فوجی جب بہت لمبے عرصے تک سرحد پر تعینات رہتے ہیں تو ایک دوسرے سے واقفیت پیدا ہو جاتی ہے اور اسی وجہ سے بعض اوقات ایک دوسرے کا چھوٹا موٹا کام کر دیتے ہیں۔

قوی امکان ہے کہ اس مقامی سطح کی پیش رفت کو کچھ لوگ زیادہ اہمیت دے رہے ہوں۔

جہاں تک بھارتی فوج کے باقاعدہ طور پر ایل او سی کے پار آ کر امدادی کاموں میں حصہ لینے کی بات ہے تو فی الحال اس کی نہ کوئی خبر ہے اور اس کا کم ہی امکان دکھائی دیتا ہے۔