ندیم سعید بی بی سی اردو ڈاٹ کام، ملتان

	حملے میں ہلاک ہونے والا ایک شخص

منڈی بہاؤالدین کے ضلعی ہیڈ کوارٹر ہسپتال کے شعبہ حادثات میں ڈیوٹی پر موجود ڈاکٹر محمد ارشد نے بی بی سی کو بتایا کہ زخمیوں میں سے تین کو تشویشناک حالت کے پیش نظر لاہور کے میو ہسپتال اور نزدیکی ملٹری ہسپتال میں منتقل کیا گیا ہے۔

ہلاک ہونے والوں میں سے دو افراد نے موقع پر جبکہ باقی چھ نے ہسپتال آ کر دم توڑا۔ ہلاک ہونے والوں کے نام ستر سالہ محمد اسلم، سولہ سالہ یاسر احمد، پینتالیس سالہ راجہ محمد الطاف، تیس سالہ عابد خان، ستر سالہ راجہ محمد اشرف، چھبیس سالہ نذیر احمد، چالیس سالہ راجہ عبدالحمید اور پینتیس سالہ محمد لہراسپ معلوم ہوئے ہیں۔

شدید زخمیوں کے نام بارہ سالہ عدنان، چالیس سالہ بشارت اور ریٹائرڈ کیپٹن محمد ایوب بتائے گئے ہیں۔

ان کا کہنا تھا کے ابتدائی معلومات کے مطابق حملہ آور تعداد میں تین تھے اور وہ ایک موٹر سائیکل پر سوار آئے تھے۔ حملہ آوروں کی شناخت نہیں ہوسکی۔

احمدیوں کو انیس سو تہتر میں وزیر اعظم ذوالفقار علی بھٹو کے دور میں غیر مسلم قرار دے دیا گیا تھا اور پاکستانی ریاست میں اب ان کو اقلیت کی حیثیت سے جانا جاتا ہے۔

احمدیہ جماعت سے تعلق رکھنے والے لوگ اور ان کی عبادت گاہیں اس سے قبل بھی متعدد بار انتہا پسند مسلمانوں کے حملوں کا نشانہ بن چکے ہیں۔