علی سلمان لاہور

توہیںِ رسالت کے غلط استعمال کے خلاف مظاہرے ہوئے ہیں

جرمانے کی عدم ادائیگی کی صورت میں ملزم کو مزید چھ ماہ قید بھگتنا ہوگی۔

اقبال کے خلاف تھانہ تھرکی والا سمندری میں اس سال تئیس مارچ کو توہین رسالت کی دفعہ دو سو پچانوے سی کے تحت مقدمہ درج کیا گیا تھا۔

مقدمہ کے مدعی چک دو سو ستائیس گ ب کی مسجد کے امام ذوالفقار ہیں۔ انہوں نے الزام عائد کیا تھا کہ ملزم نے تھانے میں آ کر ان سے مذہب پر بحث و تکرار کی اور اس دوران اس نے مسلمانوں کے نبی کی شان میں گستاخی کی۔

ملزم کے وکیل مظفر احمد نے بی بی سی ڈاٹ کام کو بتایا کہ اقبال نے ضمانت قبل از گرفتاری کروالی تھی جس کی بعد میں توسیع نہ ہو سکی اور انہیں ضمانت کی منسوخی کے بعد گرفتار کر لیا گیا تھا۔ایڈیشنل سیشن جج کی عدالت میں دو میں سے ایک گواہ پیش ہوا۔

مظفر احمد ایڈووکیٹ نے کہا کہ انہوں نے ہائی کورٹ میں مقدمہ اس عدالت سے تبدیل کرنے کی درخواست بھی کی تھی جو سماعت کے لیے منظور نہ ہوسکی۔ پیر کو عدالت نے فیصلہ سنا دیا۔

جماعت احمدیہ کے ترجمان راشد جاوید نے کہا ہے کہ ’اقبال چار پانچ سال قبل جماعت احمدیہ میں شامل ہوئے تھے اور ان کے خاندان کے دیگر تمام افراد نے ان کی مخالفت کی تھی اور انہیں یہ گاؤں چھوڑنا پڑا تھا۔وہ شادی کرنے کے بعد بہاولنگر کے ایک چھوٹے سے قصبے میں زندگی بسر کر رہے تھے اور چار پانچ سال کے بعد اپنے گاؤں کی محبت میں لوٹے تھے کہ ان پر یہ مقدمہ بنا دیاگیا‘۔انہوں نے کہا کہ’ اقبال کی گرفتاری کے بعد اس کے گھر پہلے بچے کی پیدائش بھی ہوئی ہے‘۔

اس سال کے دوران فیصل آباد میں توہین رسالت کایہ تیسرا مقدمہ ہے جس میں عمر قید کی سزا دی گئی ہے۔ اس سے پہلے فیصل آباد میں الگ الگ مقدمات میں دو عیسائی افراد کو سزا سنائی جا چکی ہے۔

پاکستان میں توہین رسالت کا قانون رائج ہے جس کے تحت اس کے مرتکب شخص کو سزائے موت تک دی جاسکتی ہے۔ پاکستان کی ماتحت عدالتیں عام طور پر ان مقدمات میں موت تک کی سزا سناتی ہیں۔جن میں اکثر اعلی عدالتوں سے کالعدم قرار دی گئیں ہیں۔

توہین رسالت کے مقدمات میں ملوث بعض افراد کو قتل بھی کیا جا چکا ہے اور بعض کو جلاوطنی کی زندگی بسر کر نا پڑ رہی ہے۔