’ہمیں ڈرا دھمکا کر ملک سے نکال دیا گیا‘

ڈاکٹر شازیہ خالد جو اس وقت لندن میں مقیم ہیں، بی بی سی اردو سروس کے ساتھ بات کرتے ہوئے کہا ہے کہ انہوں نے سنا ہے کہ جنرل پرویز مشرف نے اسلام آباد میں خواتین کی ایک کانفرنس میں کہا ہے کہ ڈاکٹر شازیہ خالد خود ملک چھوڑ کر چلی گئی تھیں اور وہ اب ملک کو بدنام کر رہی ہیں۔

ڈاکٹر شازیہ خالد نے کہا میں نے ملک چھوڑا نہیں بلکہ مجھے مجبور کیا گیا تھا کہ میں اپنے ملک سے چلی جاؤں۔

ڈاکٹر شازیہ نے کہا کہ شناخت پریڈ کے دوران ملڑی انٹیلجینس کے ایک میجر ان کے پاس آئے تھے اور ان کو کہا کہ وہ ملک سے چلے جائیں کیونکہ ان ( ڈاکٹر شازیہ) کی جان کو خطرہ ہے۔

ڈاکٹر شازیہ نے کہا کہ فوجی افسر نے کہا تھا کہ ان کو پتہ ہے کہ ملزم کون ہے اور وہ فوج کی حراست میں ہے اور جوں ہی دوسرے ملک پہنچیں گی تو ان کو اچھی خبر سنے کو ملے گی۔

ڈاکٹر شازیہ خالد نے کہا کہ انہیں پرویز مشرف کی حفاظت کی ضرورت نہیں ہے اور وہ صرف یہ چاہتی ہیں کہ ان کو انصاف ملے۔’ میں نے انصاف کے لیے آواز آٹھائی ہے مجھے انصاف کی ضرروت ہے نہ کہ حفاظت کی‘

ڈاکٹر شازیہ خالد نے کہا کہ وہ یہاں پناہ گزینوں کی زندگی گذار رہے ہیں اور ان کو اپنا ملک چھوڑنے کا کوئی شوق نہیں تھا ۔ ڈاکٹر شازیہ نے کہا کہ زیادتی سے پہلے پاکستان میں خوش و خرم زندگی گذار رہی تھیں۔’خدا کے شکر تھا ہم پاکستان میں بہت خوش تھے، میرے شوہر بہت اچھی جاب کرتے تھے ہمیں یہاں آنے کا کوئی شوق نہیں تھا‘

ڈاکٹر شازیہ نے جنرل پرویز مشرف کے اس بیان پر کہ وہ ملک کو بدنام کر رہی ہیں کہا کہ ان کی نظر میں ملک اسی دن بدنام ہو گیا تھا جب ان کے ساتھ زیادتی ہوئی تھی۔

ڈاکٹر شازیہ نے کہا کہ اگر میرے ملزم کو پکڑ کر سزا دی جائے تو پھر ان کو کسی حفاظت کی ضرروت نہیں ہو گی۔

ڈاکٹر شازیہ خالد نے کہا ان کا کیس ہی ختم کر دیا گیا ہے ۔ انہوں نے کہا جب وہ اسلام آباد کے ایک گھر میں نظر بند تھیں تو اس وقت انکوئری ٹرایبونل کی رپورٹ آنے والی تھی۔

انہوں نے کہا اسلام آباد میں نظر بندی کے دوران ان کو ٹرایبونل کی رپورٹ کی کوئی خبر نہیں مل سکی تھی۔

ڈاکٹر شازیہ نے کہا کہ لندن میں انہیں اپنے ذرائع سے ٹرایبونل کی جو رپورٹ ملی ہے اس سے لگتا ہے کہ ان کا مقدمہ ختم کر دیا گیا ہے۔

ڈاکٹر شازیہ نے کہا وہ ٹرایبونل کی رپورٹ سے مطمعئن نہیں ہیں اور وہ سمجتی ہیں کہ یہ سب کچھ سوچے سمجھے منصوبے کے تحت کیا گیا ہے۔

ڈاکٹر شازیہ نے مطالبہ کیا ان کے مقدمے کا جائزہ کسی غیر جانبدار جج سے کروایا جائے۔

انہوں نے کہا کہ اگر ان کو اپنے ملک میں انصاف مل جاتا تو وہ کبھی بیرون ملک نہ آتیں اور اب بھی اگر ان کے ملزم کو پکڑا جائے اور اسے سزا ملے تو وہ واپس اپنے ملک چلی جائیں گی۔