عزیزاللہ خان
بی بی سی اردو ڈاٹ کام، کوئٹہ |  |
لیڈی ڈاکٹر شازیہ خالد سے مبینہ زیادتی کے حوالے سے قائم عدالتی ٹریبیونل نے اپنی رپورٹ بلوچستان حکومت کو پیش کر دی ہے۔ بلوچستان ہائی کورٹ کے جسٹس احمد خان لاشاری پر مشتمل ٹریبیونل نے پینتیس صفحات پر مشتمل رپورٹ محکمہ داخلہ کے حکام کے حوالے کر دی ہے۔ اس رپورٹ میں انیس افراد کے بیان قلمبند کیے گئے تھے جن میں ڈیفنس سروسز گارڈ کے کیپٹن حماد اور ناظم ڈیرہ بگٹی کاظم بگٹی شامل ہیں جبکہ لیڈی ڈاکٹر شازیہ خالد نے اپنا تحریری بیان ٹریبیونل کو دیا تھا۔ ٹریبیونل نے سترہ جنوری سے کام شروع کیا تھا اور ٹریبیونل قائم کرنے کا فیصلہ صوبائی کابینہ نے کیا تھا۔ ٹریبیونل نے رپورٹ پندرہ دن کے اندر پیش کرنا تھی لیکن اس میں توسیع کی جاتی رہی جس کی وجہ گواہوں اور لوگوں کی عدم دلچسپی بتائی گئی ہے۔ لیڈی ڈاکٹر شازیہ خالد سے دو اور تین جنوری کی درمیانی شب زیادتی کی گئی تھی۔ وہ سوئی گیس فیلد میں قائم پاکستان پیٹرولیم لمیٹڈ کے ہسپتال میں لیڈی ڈاکٹر کے عہدے پر تعینات تھیں۔ ان سے مبینہ زیادتی کے حوالے سے ڈی ایس جی کے کیپٹن حماد کا نام لیا جاتا رہا ہے لیکن پولیس حکام کے مطابق ڈی این اے ٹیسٹ اور شناخت پریڈ میں کیپٹن حماد کے ملوث ہونے کے شواہد نہیں ملے۔ لیڈی ڈاکٹر سے زیادتی کے واقعہ کے بعد سوئی میں فسادات پھوٹ پڑے تھے جہاں سوئی گیس فیلڈ اور ڈی ایس جی کے اہلکاروں پر حملے کیے گئے اور اس دوران دونوں جانب سے بھاری ہتھیاروں سے فائرنگ کے تبادلے ہوئے جن میں کم سے کم آٹھ افراد ہلاک اور تیس سے زیادہ زخمی ہوئے تھے۔ | 
یہ صفحہ دوست کو ای میل کیجیئے
پرِنٹ کریں
