اعجاز مہر بی بی سی اردو ڈاٹ کام، اسلام آباد

حکومت نے سردار بگٹی سے بات چیت کی کوشش کی ہے

پیر اور منگل کی درمیانی شب انہوں نے حکومتی موقف پیش کرتے ہوئے کہا کہ کیپٹن حماد سمیت آٹھ ’ڈفینس سیکورٹی گارڈز‘ اور پانچ پاکستان پیٹرولیم لمیٹیڈ کے ملزمان کا ڈی این اے ٹیسٹ کرایا گیا۔

انہوں نے ایوان کو مزید بتایا کہ کیپٹن حماد سمیت کئی لوگوں کے آڈیو اور ویڈیو ٹیپ ملزمان کی شناخت کے لیے ڈاکٹر شازیہ کو بھیجے گئے لیکن ان میں سے کسی پر بھی انہوں نے شک ظاہر نہیں کیا۔

وزیر داخلہ نے بی بی سی کے ساتھ ڈاکٹر شازیہ کے شوہر خالد خواجہ کی بات چیت کے حوالے سے کہا کہ انہوں نے تسلیم کیا ہے کہ ان پر کسی قسم کا کوئی دباؤ نہیں ہے۔

انہوں نے بتایا کہ بلوچستان ہا ئی کورٹ کے جسٹس احمد خان لاشاری پر مشتمل تحقیقاتی ٹریبونل آئندہ ہفتے تک اپنی رپورٹ مکمل کرلے گا جس کے بعد حکومت کارروائی کرے گی۔

بلوچستان میں جاری بڑے ترقیاتی منصوبوں کا ذکر کرتے ہوئے انہوں نے کہا کہ صدر جنرل پرویز مشرف کی ہدایت پر حکومت صوبے سے احساس محرومی ختم کرنے کے لیے کام کر رہی ہے۔

انہوں نے بتایا کہ کوئٹہ سے چار افراد گرفتار ہوئے ہیں، ان کا تعلق ڈیرہ بگٹی سے ہے اور انہوں نے صوبے میں شدت پسندی کی کئی کارروائیوں میں ملوث ہونے کا اعتراف کیا ہے۔ وزیر داخلہ نے مری کیمپ پر چھاپے اور برآمد ہونے والے اسلحہ کا بھی ذکر کیا اور کہا کہ حکومت ہر قیمت پر اہم تنصیبات کی حفاظت یقینی بنائے گی اور کسی کو بھی امن امان خراب کرنے کی اجازت نہیں دے گی۔

قبل ازیں بلوچستان کی صورتحال پر جاری کئی دنوں سے بحث کے آخری دن کا آغاز سابق وزیراعظم میر ظفراللہ جمالی نے کیا۔

حکومت نے پہلی مرتبہ سرکاری طور پر ڈی این ٹیسٹ کے متعلق بیان دیا ہے

جناب جمالی نے کہا بلوچستان کے لیے فوجی کارروائی کی بات کوئی نئی نہیں ہے اس سے پہلے بھی فوجی آپریشن کیا جاتا رہا ہے اور جو لوگ صوبے کے حقوق کی بات کرتے ہیں انہیں غدار کا لقب دیا جاتا رہا ہے۔ انہوں نے کہا اب ایسا نہیں ہوگا اور مرکز کو اپنا رویہ تبدیل کرنا ہوگا اور کسی کو بھی انا کا مسئلہ نہیں بنانا چاہیے۔

سابق وزیراعظم نے صدر جنرل پرویم مشرف کی تعریف کی لیکن اپنی جماعت کے سربراہ چودھری شجاعت حسین کا نام لیے بغیر کہا کہ ان کی سربراہی میں قائم کمیٹی کی سفارشات پہلے ایوان میں پیش ہوتیں جن پر بحث ہوتی لیکن ایسا نہیں کیا گیا۔

انہوں نے چودھری شجاعت کے اس بیان کہ’ کمیٹی کو کام کرنے نہیں دیا جاتا، کا حوالہ دیا اور کہا کہ انہیں وضاحت کرنی چاہیے کہ وہ کون لوگ ہیں جو رکاوٹ بنے انہیں ان کے نام لینا چاہیے۔

ان کے مطابق بلوچستان کی آبادی لاہور سے بھی کم ہے اور جب بسنت پر آٹھ ارب روپے خرچ ہوسکتے ہیں تو اس کی آدھی رقم بلوچستان پر کیوں خرچ نہیں کی جاسکتی؟

متحدہ مجسل عمل کے حافظ حسین احمد نے کہا کہ ان کے بلوچ سرداروں سے نظریاتی اختلافات ہیں لیکن صوبے کے حقوق کی جدوجہد میں وہ ان کا ساتھ دیں گے۔

انہوں نے جب ٹی وی بیچ کر اسلحہ خریدنے کی ترغیب دینے والوں کا ذکر کیا تو متحدہ قومی موومنٹ کے کنور خالد یونس کی ان کے ساتھ گرما گرمی ہوگئی۔

حکمران اتحاد میں شامل پیرپگاڑہ کی جماعت کی رکن اسمبلی میڈم خورشید افغان نے کہا کہ نواب بگٹی کے پاس حکومت کو بات چیت کے لیے کسی بڑی شخصیت کو بھیجنا چاہیے۔ انہوں نے کہا کہ سید مشاہد حسین کو میں ہی نہیں مانوں گی تو بگٹی کہاں سے مانے گا۔

قومی اسمبلی میں تحریک التویٰ پر جاری بحث مکمل ہوگیا ہے اور اب اجلاس منگل کی صبح دس بجے ہوگا۔