ریاض سہیل بی بی سی اردو ڈاٹ کام، کراچی

دوسرے مرحلے کے انتخابات کو مخالف سیاسی جماعتیں مسترد کر چکی ہیں

تیسرے مرحلے کے لیے چھ اکتوبر کو ضلع اور تعلقہ / ٹاؤن ناظمین اور مخصوص نشستوں پر ضلع اور تعلقہ / ٹاؤن کے ممبران کا انتخاب ہوگا۔

ملک کے ایک سو نو اضلاع میں متعلقہ رٹرننگ افسران کے دفاتر سے نامزدگی فارم کا اجرا بارہ ستمبر تک جاری رہے گا۔ جبکہ تیرہ ستمبر تک فارم وصول کیے جائیں گے۔ چودہ ستمبر کو امیدواروں کی ابتدائی فہرست جاری کردی جائےگی۔

اس مرحلے کے امیدواروں کے خلاف پندرہ ستمبر کو اعتراضات داخل کیے جا سکیں گے۔ سولہ ستمبر کو اعتراضات کی سماعت اور کاغدات کی چھان بین ہوگی۔

اٹھارہ ستمبر کو اپیلیں دائر کی جائیں گی اور بیس ستمبر کو ان اپیلوں کی سماعت ہوگی۔ اکیس ستمبر کو امیدوار دستبرداری کی درخواست دے سکیں گے جبکہ بائیس ستمبر کو امیدواروں کی حتمی فہرستیں شائع کردی جائے گی۔

چھ اکتوبر کو ضلع و تعلقہ ناظمین کے لیے پولنگ ہوگی۔ جس کے لیے تحصیل ہیڈکوارٹرز میں پولنگ اسٹیشن قائم کئے جائیں گے۔ جبکہ دس اکتوبر کو نتائج کا سرکاری طور پر اعلان کیا جائیگا۔

ضلع اور تعلقہ کونسلوں میں کسان ورکر، خواتین، کسان ورکر اور اقلیتی نشستیں مجموعی تعداد کے تینتیسں فیصد تناسب سے مقرر کی جائیں گی۔

لوکل گورنمنٹ آرڈیننس میں ترمیم کے بعد ضلع نائب ناظم اور تعلقہ نائب ناظم کے انتخاب کا طریقہ تبدیل ہوگیا ہے۔ پہلے انہیں ضلع ناظم اور تعلقہ نائب ناظم کے ساتھ منتخب کیا جاتا تھا لیکن اب ضلع اور تعلقہ نائب ناظم کا انتخاب متعلقہ کونسلیں اپنے پہلے اجلاس میں کریں گی اور امیدواروں کا رکن کونسل ہونا ضروری ہوگا۔

واضح رہے کہ بلدیاتی انتخابات کے لیے اٹھارہ اگست کو پہلے مرحلے میں تریپن اضلاع میں یونین کونسل کے انتخابات ہوئے تھے جبکہ پچیس آگست کو ہونے والے دوسرے مرحلے میں چھپن اضلاع میں یونین کونسل کی سطح پر الیکشن ہوئے تھے۔

تیسرے مرحلے کے لیے انتخابات انتیس ستمبر کو ہونے تھے مگر بعد میں توسیع کی گئی۔