ہارون رشید بی بی سی اردو ڈاٹ کام، پشاور

چوبیس میں سے اکیس افراد کی شناخت کر لی گئی جوکہ سب کے سب مقامی قبائلی بتائے جاتے ہیں

پاکستانی فوجی حکام کے مطابق پاک افغان سرحد پر جمعرات اور جمعہ کی درمیانی شب ’اتحادی فوج‘ کے ساتھ جھڑپ میں یہ چوبیس مشتبہ طالبان ہلاک ہوئے جن کی لاشیں پاکستانی فوج نے بعد میں قبضے میں لے لیں ہیں۔

جنوبی وزیرستان میں بی بی سی کے نمائندے دلاور خان وزیر کے مطابق ان چوبیس میں سے اکیس افراد کی شناخت کر لی گئی جوکہ سب کے سب مقامی قبائلی بتائے جاتے ہیں۔ تین کی شناخت نہیں ہوسکی جس کی وجہ ان مسخ شدہ لاشیں تھی۔ اس علاقے میں بسنے والے اکثر قبائل سرحد کے دونوں جانب آباد ہیں۔

ان افراد کو شمالی اور جنوبی وزیرستان کے مختلف علاقوں میں ان کے آبائی قبرستانوں میں سپرد خاک کیا گیا۔ اس موقعے ہر مشتعل افراد نے امریکہ مخالف نعرہ بازی کی۔

ایک مقامی عالم مولانا عبدالرحمان کا اس موقعہ پر کہنا تھا کہ حکومت کو جہاد کا فیصلہ کرنا ہوگا۔

فوجی ترجمان کے مطابق یہ جھڑپ شمالی وزیرستان کے علاقے لوارا منڈی سے تھوڑی دور افغان سرحد کے اندر ہوئی۔ ان کا کہنا ہے کہ اس علاقے میں سرحد کی صحیح طور پر نشاندہی نہیں ہو سکتی لہذا یہ کہنا مشکل ہے کہ آیا ’اتحادی فوج‘ نے ان طالبان کو پاکستانی سرحد کے اندر ہلاک کیا۔