مبشر زیدی بی بی سی اردو ڈاٹ کام، اسلام آباد

میجر جنرل شوکت سلطان نے بی بی سی سے بات کرتے ہوئے کہا کہ یہ واضح نہیں ہو سکا کہ آیا یہ طالبان جب ہلاک ہوئے تو کس ملک کی سرحد میں تھے۔

ترجمان کے مطابق یہ جھڑپ شمالی وزیرستان کے علاقے لوارا منڈی سے تھوڑی دور افغان سرحد کے اندر ہوئی۔ ان کا کہنا ہے کہ اس علاقے میں سرحد کی صحیح طور پر نشاندہی نہیں ہو سکتی لہذا یہ کہنا مشکل ہے کہ آیا ’اتحادی فوج‘ نے ان طالبان کو پاکستانی سرحد کے اندر ہلاک کیا۔

انہوں نے کہا کہ جب جھڑپ کے دوران طالبان پسپا ہونے لگے تو لگتا ہے کہ انہوں نے پاکستان کی سرحد میں داخل ہونے کی کوشش کی مگر اسی دوران وہ ہلاک ہو گئے۔

ان کا کہنا تھا کہ یہ افراد پاکستانی نہیں لگتے اور شاید یہ افغانی یا وسطی ایشیائی ممالک کے باشندے ہیں۔

پاکستان کے ایک نجی ٹی وی چینل نے دعویٰ کیا ہے کہ ان مشتبہ طالبان کو ایک میزائل حملے میں ہلاک کیا گیا ہے۔