ریاض سہیل
بی بی سی اردو ڈاٹ کام کراچی |  |
|  اے آر بلوچ اپنی منفرد آواز اورادائیگی کے انداز کی وجہ سے الگ پہچان رکھتے تھے |
سندھ کے نامور ہرفن مولا فنکار اے آر عرف عبدالرسول بلوچ انتقال کرگئے۔ ان کی عمر نوے برس تھی۔ وہ طویل عرصے سے بیمار تھے اورگزشتہ روز کراچی کے ایک ہسپتال میں انتقال کرگئے۔ بلوچ نے پی ٹی وی کے’جنگل‘ اور ’دیواریں‘ جیسے سپرہٹ ڈراموں کے علاوہ درجنوں اسٹیج، ریڈیو اور ٹی وی کےاردواور سندھی ڈراموں اور فلموں میں کام کیا۔ انیس سو پندرہ میں حیدرآباد میں جنم لینے والے اے آر بلوچ اپنی منفرد آواز، ادائیگی کے انداز کی وجہ سے الگ پہچان رکھتے تھے۔ اس وجہ سے ڈرامہ کی دنیا کے بادشاہ تھے، جن سے کئی ابھرتے ہوئے فنکاروں نے سیکھا اور بلندیوں کو چھوا۔ انہوں نے فن کی ابتداء ریڈیو پاکستان حیدرآباد سے صدا کاری سے کی۔ کچھ عرصہ اسٹیج پر بھی کام کیا بلوچ کے بارے میں یہ مشہور تھا کہ ان کو جو بھی کردار ملا، انہوں نے اپنی آواز کے جادو سے اس میں جان ڈال دی۔ ان کی تدفین آبائی شہر حیدرآباد میں کی گئی۔انہوں نے ایک بیٹا اور تین بیٹیوں کے علاوہ ہزاروں پرستار سوگوار چھوڑے ہیں۔ | 
یہ صفحہ دوست کو ای میل کیجیئے
پرِنٹ کریں
