سیف اللہ لاہور

بطور ہدایتکارہ ریما کی پہلی فلم کی نمائش لاہور کے میٹروپول سینیما میں ہوگی

ریما نے تقریبا دو سال قبل جب فلم سازی کے میدان میں قدم رکھنے اور اپنی فلم کی ہدایات خود دینے کا اعلان کیا تو کچھ فلمی حلقوں کی طرف سے کہا گیا کہ یہ ریما کے بس کی بات نہیں-

تاہم ریما نے ان تبصروں کی پروا کیے بغیر فلم پر کام شروع کر دیا- انہوں نے معروف مصنف خلیل الرحمان قمر سے سکرپٹ لکھوایا، نغمہ نگار احمد عقیل روبی سے گیت لکھوائے اور فلم کے باقی تمام کام اپنی نگرانی میں کرایا۔

ان کی فلم میں ایک کردار ایسا تھا جس کے لیے انہیں لولی وڈ سے کوئی اداکارہ موزوں نہیں لگ رہی تھی چنانچہ انہوں نے لندن میں مقیم ایک بھارتی ماڈل اور اداکارہ سمرن کو کاسٹ کیا اور پاکستانی کی فلمی تاریخ میں پہلی مرتبہ ایسا ہوا ہے کہ کسی بھارتی آرٹسٹ نے پاکستانی فلم کام کیا ہے۔

تاہم پاکستان کی طرف سے کافی فنکار بھارتی فلموں میں کام کر چکے ہیں مثال کے طور پر حال ہی میں میرا کی بھارتی فلم’نظر‘ ریلیز ہوئی ہے- اس سے قبل وینا ملک کی فلم’پنڈ دی کڑی‘ بھارت میں ریلیز ہوچکی ہے- معمر رانا کی فلم’دوبارہ‘ بھی ریلیز ہو چکی ہے اور اب اداکارہ ثنا بھارتی فلم ’قافلہ‘ میں کام کر رہی ہیں-

پاکستانی اداکاراؤں کے بھارتی فلموں میں کام کرنے سے متعلق ایک سوال کے جواب میں ریما کہتی ہیں کہ اس میں کوئی شک نہیں کہ پاکستان کی فلم انڈسٹری بحران کا شکار ہے اور یہاں پر کام نہیں لیکن ’ہمیں اس بحران کا مقابلہ کرنا چاہیے نہ کہ کسی دوسرے ملک میں چلے جانا چاہیے-‘

اپنی فلم کے لیے ریما نے لاہور میں میٹروپول سینما فائنل کیا ہے اور اس حوالے سے ریما کے ادارے آر کے پروڈکشن اور میٹروپول انتظامیہ کے درمیان معاہدہ ہو گیا ہے- ریما کو اپنی پہلی فلم سے بڑی توقعات ہیں- ان کی توقعات کہاں تک پوری ہوتی ہیں اس کا پتہ فلم کے سینما سکرین پر جانے کے بعد ہی چلے گا -