ندیم سعید (ملتان) اور مبشر زیدی (اسلام آباد)

مختار مائی مستقل پہرے میں ہیں

اس سے پہلے کہا گیا تھا کہ مختار مائی پر حکومت کی طرف سے بیرون ملک سفر کرنے پر عائد پابندی ہٹا لی گئی ہے۔

بی بی سی سے بات کرتے ہوۓ مختار مائی نے بتایا کہ انہیں بدھ کے روز اسلام آباد میں قائم امریکی سفارت خانے لے جایا گیا جہاں سے انہوں نے ویزے کے لئے جمع کرایا گیا اپنا پاسپورٹ حکام کے کہنے پر واپس لے لیا۔

مختار مائی نے بتایا کہ پاسپورٹ ان سے وزیر اعظم کی مشیر نیلوفر بختیار نے لے لیا ہے اور انہیں کہا گیا ہے کہ آئندہ جب بھی انہیں باہر جانے کی ضرورت پڑے تو وہ اپنا پاسپورٹ حکومت سے طلب کر سکتی ہیں۔ تاہم سرِ دست ان کا پاسپورٹ حکومت کی تحویل میں ہی رہے گا۔

مختار مائی کا کہنا تھا کہ امریکی سفارت خانہ ان کو ویزہ دینا چاہتا تھا لیکن انہوں نے درخواست کی کہ وہ ان کا پاسپورٹ واپس کر دے۔ امریکی سفارتی عملے نے ان کا پاسپورٹ واپس کرتے ہوۓ کہا کہ انہیں

ہمیں احساس ہے کے وہ کن مشکل حالات سے گزر رہی ہیں امریکی سفارتی عملہ

وزیر اعظم کے ترجمان نے بی بی سی سے بات کرتے ہوئے اس بات کی تصدیق کی کہ مختار مائی پر عائد پابندی اٹھا لی گئی ہے۔

تاہم مختار مائی کے وکیل چوہدری اعتزاز احسن نے کہا کہ انہیں مختاراں مائی سے ملنے نہیں دیا جا رہا۔

اعتزاز احسن نے بدھ کو قومی اسمبلی کے اجلاس میں کہا کہ ان کو پتہ نہیں ہے کہ مختار مائی کہاں ہے۔ انہوں نے یہ بھی الزام لگایا کہ مختاراں مائی پر حکومت دباؤ ڈال رہی ہے کہ وہ اپنا وکیل تبدیل کر لیں۔

تاہم وفاقی وزیر اطلاعات شیخ رشید نے اعتزاز احسن کے جواب میں کہا ہے کہ ان کا یہ کہنا غلط ہے کہ مختار مائی کی نقل و حرکت پر پابندی لگائی گئی ہے۔ انہوں نے کہا کہ مختار مائی نے سوموار کو ایک پریس کانفرنس بھی کی ہے جس کے بعد اس بارے میں تمام شبہات ختم ہو جانے چاہئیں۔

واضح رہے کہ مختار مائی نے منگل کو اسلام آباد میں ایک پریس کانفرنس میں کہا تھا کہ انہوں نے امریکہ جانے کے لیے جمع کرائی گئی درخواست واپس لینے کا فیصلہ کیا ہے۔ تاہم ان کا کہنا ہے کہ میر والا میں ان کی نقل و حرکت پر پابندی بدستور قائم ہے اور ان کا نام ایگزٹ کنٹرول لسٹ پر ڈالنے سے ان پر دباؤ ہے۔

مختار مائی اپنے گاؤں میں لڑکیوں کا سکول قائم کرنا چاہتی ہیں

مختار مائی نے کہا کہ ان کو حکومت نے یقین دہانی کرائی ہے کہ ان کی نظر بندی ختم کر دی جائے گی اور وہ کہیں بھی جا سکتی ہیں۔انہوں نے کہا کہ وہ ایک آزاد شہری ہیں اور وہ کہیں بھی جا سکتی ہیں۔

مختار مائی کو پیر کی شام میر والا سے پہلے لاہور اور پھر اسلام آباد لایا گیا۔ انسانی حقوق کی تنظیموں کا کہنا ہے کہ حکومت مختاراں مائی کے اوپر شدید دباؤ ڈال رہی ہے کہ وہ ملک سے باہر نہ جائیں۔

انہوں نے کہا تھا کہ ان کو کل رات ان کے بھائی نے فون کر کے بتایا کہ ان کی والدہ کی طبیعت خراب ہے اور اس وجہ سے وہ امریکہ جانے کے لیے جمع کرائی گئی درخواست واپس لے رہی ہیں۔ مختاراں مائی نے کہا کہ وہ مستقبل میں امریکہ ضرور جائیں گی۔

انہوں نے صدر جنرل پرویز مشرف کی طرف سے سکول قائم کرنے کے لیے دی گئی مدد کے سوال کے جواب میں کہا کہ صدر جنرل پرویز مشرف پاکستان کے صدر ہیں اور اگر وہ ان کی مدد نہ کرتے تو کیا امریکہ والے ان کی مدد کرتے۔