ہارون رشید بی بی سی اردو ڈاٹ کام، پشاور

یہ واقعہ جنوبی وزیرستان کے صدر مقام وانا میں ہفتے کی صبح سات بجے کے قریب پیش آیا۔ ایک سفید گاڑی میں سوار نامعلوم مسلح افراد نے راہ چلتے صحافی مجیب الرحمان پر جو کہ بین الاقوامی خبر رساں ایجنسی رائٹرز کے لیے کام کرتے ہیں، گولی چلا دی۔

عینی شاہدین کے مطابق مجیب سڑک کے کنارے ایک گڑھے میں گرنے کی وجہ سے بچ گئے لیکن انہیں اس سے قبل بازو پر گولی لگی ہے۔ البتہ ان کی جان کو کوئی خطرہ نہیں ہے۔

اس سے قبل فروری میں وانا میں دو مقامی صحافیوں میر نواب اور اللہ نور وزیر کو نامعلوم افراد نے گولیاں مار کر ہلاک کر دیا تھا۔ ابھی تک اس واقعہ کی تحقیقات میں کوئی پیش رفت نہیں ہوئی ہے اور نہ کوئی گرفتاری عمل میں آئی ہے۔ اس واقعے کے بعد مقامی صحافتی حلقوں میں خوف کی لہر دوڑ گئی تھی۔

حقوق انسانی اور صحافتی آزادی کے لئے کام کرنے والی بین الاقوامی اور قومی تنظیمیں ماضی میں وزیرستان میں صحافیوں کے لئے ناسازگار حالات پر تشویش کا اظہار کرتی رہی ہیں۔

جنوبی وزیرستان میں اس واقعے کا ایسے وقت پیش آنے پر تشویش میں مزید اضافہ ہوا ہے جب وہاں حالات قدرے معمول پر آ رہے ہیں۔

پاکستانی فورسز جنوبی وزیرستان میں ڈیڑھ دو سال سے مشتبہ القاعدہ اور طالبان کے اراکین کے خلاف کارروائیوں میں مصروف رہی ہیں۔