ذوالفقار علی
بی بی سی اردو ڈاٹ کام ، مظفرآباد |  |
|  مظاہرین میں خواتین اور بچے بھی شامل تھے |
پاکستان کے زیرانتظام کشمیر میں جمعرات کو ان دو درجن سے ز ائد سابق کشمیری عسکریت پسندوں کو رہا کیا گیا جن کو مظفرآباد اور سرینگر کے درمیان بس سروس کے آغاز کے موقع پر حراست میں لیا گیا تھا۔ یہ رہائی ان افراد کے اہل خانہ اور حامیوں کی طرف سے مشترکہ احتجاجی دھرنے کے بعد عمل میں لائی گئی۔ رہا ہونے والے بیشتر افراد کا تعلق سابق عسکریت پسندوں کی تنظیم یونائیٹڈ حقیقی موومنٹ سے ہے۔ یہ تنظیم بھارت اور پاکستان کے درمیان امن کے عمل کو زبردست حمایت کرتی ہے ۔ جمعرات کو درجنوں افراد نے مظفرآباد میں قائم سینڑل پریس کلب کے احاطے میں دھرنا دیا۔ اس دھرنے میں یونائیٹڈ حقیقی مومنٹ کے زیر حراست دو درجن سے زائد افراد کے اہل خانہ عزیز’ اقارب اور ان کے حامیوں نے شرکت کی۔ اس موقع پر مظاہرین زیر حراست افراد کی رہائی کے لئے نعرہ بازی کرتے رہے ۔کچھ بچوں نے کتبے اٹھا رکھے تھے جن پر مختلف نعرے درج تھے اور ایک بچے کے کتبے پر یہ درج تھا کہ’ میرے والد کو رہا کرو‘ جبکہ دوسرے پر انگریزی میں یہ درج تھا کہ’ ہم واپس جانا چاہتے ہیں‘۔ دھرنے کے دوران ایک مرحلے پر صورت حال بگڑتے بگڑتے رہ گئی جب موقع پرموجود ایک مجسٹریٹ نے مظاہرین کے بارے میں اس وقت انتہائی نازیبا زبان استعمال کی جب وہ انتظامیہ کے خلاف نعرہ بازی کر رہے تھے لیکن کچھ لوگوں کی مداخلت پر صورت حال خراب ہونے سے بچ گئی۔
|  مظاہرین اسیر کیے جانے والوں کے خاندانوں کے لوگ شامل تطے |
یہ دھرنا صبح دس بجے سے سہ پہر چار بجے تک کوئی چھ گھنٹے جاری رہا اور اس دوران درجنوں پولیس اہلکار موقع پر موجود رہے۔ یہ احتجاج سہ پہر کو پرامن طور پر اس وقت ختم کیا گیا جب حکام نے احتجاجیوں کو یہ یعقین دہانی کرائی کہ زیرحراست افراد کو رہا کردیا جائے گا۔ دھرنا ختم ہونے کے کچھ گھنٹے بعد سابق عسکریت پسندوں کو رہا کردیا گیا۔رہا ہونے والوں میں بیشتر افراد محنت مزدوری کرکے بچوں کا پیٹ پالتے ہیں۔
انتظامیہ کے ایک افسر نے بی بی سی کو بتایا کہ ان افراد سے یہ تحریری ضمانت حاصل کی گئی ہے کہ وہ مستقبل میں امن عامہ کا مسئلہ پیدا نہیں کریں گے۔ جن لوگوں کو حراست میں لیا گیا تھا ان افراد میں بیشتر کا تعلق یونائیٹڈ حقیقی مومنٹ سے ہے پہلے اس تنظیم کا نام حقیقی فورس تھا۔ سابق عسکریت پسندوں کی تنظیم یونائیٹڈ حقیقی مومنٹ کا موقف یہ ہے کہ وہ 7 اپریل کو بھارت کے زیر انتظام کشمیر سے پہلی بس کے ذریعے آنے والے مہمانوں کا استقبال کرنا چاہتے تھے کہ اس سے پہلے ہی پولیس نے ان کے ساتھیوں کو بغیر کسی جواز کے حراست میں لیا۔ لیکن ضلعی انتظامیہ کا کہنا ہے کہ ان کو یہ اطلاعات تھیں وہ کوئی احتجاجی مظاہرہ کرنا چاہتے تھا جس کا مقصد ان کے اپنے بعض معاملات کی طرف توجہ حاصل کرنا تھا۔ حکام کا کہنا ہے کہ یہی وجہ تھی کہ ان لوگوں کو نقص امن کے خدشہ کہ پیش نظر حراست میں لیا گیا۔ یونائیٹڈ حقیقی فورس میں وہ لوگ شامل ہیں جو بھارت کے زیر انتظام کشمیر میں عسکری کاروائیوں کے دوران مختلف اوقات میں لائن آف کنڑول عبور کرکے پاکستان کے زیر انتظام کشمیر میں آئے اور اور پھر اپنے گھروں کو واپس نہ جاسکے۔ اس تنظیم میں شامل ان افراد کا ماضی میں مختلف کشمیری عسکری تنظیموں سے تعلق رہ چکا ہے لیکن بعد میں انھوں نے مختلف وجوہات کی بنیاد پر نہ صرف ان تنظیموں سے علحٰیدگی اختیار کی بلکہ عسکریت کو بھی ترک کیا اور اپنی ایک الگ تنظیم بنائی ۔ اس تنظیم کا دعویٰ ہے کہ اس تنظیم میں شامل افراد کی تعداد لگ بھگ چار سو ہے اور ان میں بہت سارے اپنے بیوی بچوں کے ساتھ رہتے ہیں۔ اس تنظیم میں شامل بیشتر لوگ روزی کمانے کے لئے محنت مزدوری کرتے ہیں۔ سابق عسکریت پسندوں کی یہ تنظیم ہندوستان اور پاکستان کے درمیان امن کے عمل خاص طور پر مظفرآباد اور سرینگر کے درمیان بس سروس کی زبردست حمایت کرتی ہے ۔ سابق عسکریت پسندوں کی تنظیم یہ مطالبہ کرتی آرہی ہے ان کو بھی بس کے ذریعے بھارت کے زیرانتظام کشمیر میں اپنے گھروں کو واپس بھیجا جائے۔ | 
یہ صفحہ دوست کو ای میل کیجیئے
پرِنٹ کریں
