عزیزاللہ خان بی بی سی اردو ڈاٹ کام کوئٹہ

کوئٹہ میں گزشتہ سال عاشورہ کے جلوس پر نا معلوم افراد نے حملہ کر دیا تھا جس میں لگ بھگ پچاس افراد ہلاک ہو گئے تھے

کوئٹہ کے ڈپٹی انسپکٹر جنرل پولیس پرویز رفیع بھٹی نے بتایا ہے کہ مشتبہ شخص نے اپنا نام فیصل بتایا ہے اور تسلم کیا ہے کہ وہ کالعدم تنظیم کا رکن ہے۔ ملزم سے کچھ دستاویزات ملی ہیں جن میں تنظیم کے لیڈروں کے تصویریں شامل ہیں۔

مسلم عوامی پارٹی کے چیئرمین رحیم جعفری نے ٹیلیفون پر بی بی سی کو بتایا ہے کہ شیعہ عزادار کونسل کے کارکنوں کو ملزم پر شک گزرا اور انھوں نے اس بارے میں پولیس کو مطلع کیا ہے جس پر یہ گرفتاری عمل میں آئی ہے۔ انھوں نے کہا ہے کہ ملزم کے قبضے سے اسلحہ اور بارود بھی برامد ہوا ہے لیکن ڈی آئی جی نے اس کی تردید کی ہے اور کہا ہے کہ کسی قسم کا کوئی اسلحہ برآمد نہیں ہوا ہے۔

پرویز رفیع بھٹی نے کہا ہے کہ ملزم کے نشاندہی پر مذید چھاپے مارے جا رہے ہیں اور امید ہے کے اس سلسلے میں اور گرفتاریاں ہو ں گی۔ انھوں نے کہا ہے کہ ملزم امام بارگاہ کے قریب ایک پبلک کال آفس سے کہیں ٹیلیفوں پر معلومات فراہم کر رہا تھا۔

یاد رہے کہ پولیس نے گزشتہ روز نصیر آباد سے چھ مشتبہ افراد کو گرفتار کیا تھا۔ پولیسں حکام کے مطابق فرقہ وارانہ تشدد کے حوالے سے پولیس کو مطلوب افراد کی گرفتاری کے لیے چھاپہ مارا گیا تھا لیکن اصل ملزمان فرار ہو گئے تھے چھ افراد کو گرفتار کر لیا گیا ہے جن سے پوچھ گچھ جاری ہے۔

یہاں یہ امر قابل زکر ہے کوئٹہ میں گزشتہ سال عاشورہ کے جلوس پر نا معلوم افراد نے حملہ کر دیا تھا جس میں لگ بھگ پچاس افراد ہلاک ہو گئے تھے۔ بلوچستان میں انیس سو ننانوے سے اب تک فرقہ وارانہ تشدد کے واقعات میں ایک سو تیس سے زیادہ افراد ہلاک ہو چکے ہیں۔