بلوچستان کا مسئلہ سیاسی طریقے سے حل کرنے کے لیے مہذب دنیا کو فوجی حکومت پر دباؤ ڈالنا چاہیے

اس مظاہرے میں بلوچستان کی مختلف سیاسی جماعتوں سے تعلق رکھنے والے افراد نے شرکت کی۔

بلوچستان ایکشن کمیٹی کے ایک رکن عبدالصمد بلوچ نے بی بی سی اردو سروس سے بات چیت کرتے ہوئے کہا کہ وہ چاہتے ہیں کہ مہذب اور جمہوری دنیا پاکستان کی فوجی حکومت پر بلوچستان کا مسئلہ مذاکرات اور سیاسی طریقے سے حل کرنے کے لیے دباؤ ڈالے۔

عبدالصمد بلوچ نے صدر جنرل پرویز مشرف پر کڑی تنقید کرتے ہوئے بلوچستان کے بارے میں ان کے حالیہ بیان کو کھلی ’غنڈہ گردی‘ قرار دیا۔ صدر مشرف نے اپنے ایک بیان میں کہا تھا کہ بلوچستان میں گڑ بڑ کرنے والوں کو پتہ بھی نہیں چلے گا کہ انہیں کس چیز سے مارا گیا۔

عبدالصمد نے کہا کہ اکیسویں صدی میں اپنے شہریوں کو اس طرح کی دھمکی دینا ایک غیر مہذب حرکت نہیں بلکہ کھلی غنڈہ گردی ہے۔ انہوں نے کہا کہ یہ سراسر زیادتی ہے۔ عبدالصمد نے استفسار کیا کہ کیا جنرل مشرف بلوچستان کے عوام پر ایٹم بم گرائیں گے۔

بلوچستان ایکش کمیٹی کے بارے میں انہوں نے کہا کہ یورپ اور برطانیہ میں رہنے والے تمام بلوچ خواہ ان کا تعلق کسی بھی سیاسی جماعت سے ہو اس کمیٹی کے رکن ہیں۔ انہوں نے کہا کہ اس تنظیم کو کمیٹی کا نام اسی لیے دیا گیا کیونکہ اس میں تمام سیاسی جماعتوں کے ارکان شامل ہو سکیں۔

انہوں نے کہا کہ بلوچستان ایکشن کمیٹی کو پاکستان کی تمام بڑی سیاسی جماعتوں جن میں پاکستان پیپلز پارٹی اور ایم کیو ایم بھی شامل ہیں کی حمایت حاصل ہے۔

ایک سوال کا جواب دیتے ہوئے انہوں نے کہا کہ بلوچستان کا مسئلہ پاکستان کا داخلی مسئلہ ہے لیکن فوجی ایکشن جیسے غیر مہذب اقدامات کے خلاف حکومت پر بیرونی دباؤ ڈالنا چاہیے۔

انہوں نے کہا کہ بلوچستان کے عوام کو گن پوائنٹ پر مذاکرات کے لیے مجبور نہیں کیا جا سکتا۔

مظاہرے میں مقررین نے کہا کہ بلوچستان کو فوج چھانیوں کی نہیں بلکہ سکولوں اور ہسپتالوں کی ضرورت ہے۔