مبشر زیدی بی بی سی اردو ڈاٹ کام اسلام آباد

بلوچستان میں فوجی کاروائی سے فوج کی ساکھ متاثر ہوگی: بے نظیر بھٹو

پاکستان پیپلز پارٹی کی سربراہ اور سابق وزیرِاعظم بینظیر بھٹونے ایک بیان میں کہا ہے کہ وانا کے بعد بلوچستان میں بڑھتی ہوئی بےچینی سے حکومت کی رٹ کو چیلنج کیا جا رہا ہے۔

انہوں نے مطالبہ کیا کہ بلوچستان میں سوئی گیس پلانٹ پر ایک لیڈی ڈاکٹر کے ہونے والی مبینہ زیادتی میں ملوث وردی والوں کو اس واقعہ کی تحقیقات مکمل ہونے تک معطل کر دیا جائے۔

بینظیر بھٹو نے کہا کہ اس واقعہ میں ایک فوجی افسرکے ملوث ہونے سے ان الزامات کی سنگینی میں اضافہ ہوا ہے۔

راجہ ظفرالحق:اگر کیس درج کر لیا جاتا توانگلیاں نہ اٹھتیں۔

پاکستان مسلم لیگ نواز کے چیرمین راجہ ظفرالحق کا کہنا ہے حکومت بلوچستان کے مسائل سنجیدگی سے حل کرنے کی بجائے طاقت سے لوگوں کی زبانیں بند کرنے کی کوشش کر رہی ہے۔

راجہ ظفرالحق نے کہا کہ فوج اور اس کے سربراہ جنرل مشرف ایک ہی راستہ جانتےہیں جوطاقت کا استعمال ہے۔

لیڈی ڈاکٹر کیس کے بارے میں راجہ ظفرالحق کا کہنا تھا کہ اس کیس میں ایف آئی آر کا ایک ہفتے کے بعد درج ہونا اس بات کا ثبوت ہے کہ اس واقعہ میں کوئی بااثر شخص ملوث تھا جس نے ایف آئی آر درج نہیں ہونے دی۔

انہوں نے کہا کہ اگر اس مسئلہ پر انکوائری کمیشن پہلے ہی بیٹھ جاتا اور کیس درج کر لیا جاتا تو کسی کی طرف انگلیاں نہ اٹھتیں۔

راجہ ظفرالحق نے کہا کہ عالمی سطح پرپاکستان کا موقف یہ ہے کہ لوگوں کو انصاف دلائے بغیر معاشرے سے لاقانونیت، دہشت گردی اور غربت ختم نہیں کی جا سکتی جبکہ خود اپنے ملک میں حکومت مسائل کے حل کے لیے طاقت کی پالیسی اپنا رہی ہے۔

دینی جماعتوں کے اتحاد متحدہ مجلس عمل کے قائم مقام پارلیمانی لیڈر حافظ حسین احمد نے خبردار کیا ہے کہ بلوچستان میں فوج کشی ’خودکشی‘ ثابت ہوگی۔

صدر جنرل پرویز مشرف کے ایک نجی ٹی وی کو انٹرویو، جس میں انہوں نے کہا تھا کہ اب ستر کی دھائی نہیں ہے کہ کاروائی کے بعد ہتھیاربند پہاڑوں پر چڑھ جائیں گے، کے حوالے سے حافظ حسین احمد نے کہا کہ طاقت مسئلے کا حل نہیں ہے۔

حافظ حسین احمد نے خبردار کیا کہ اگر صدر مشرف کے لیے یہ ستر کی دھائی نہیں ہے تو بلوچستان کے لوگوں کے لیے بھی یہ ستر کی دھائی نہیں ہے۔

انہوں نے لیڈی ڈاکٹر کے ساتھ مبینہ زیادتی کی مذمت کرتے ہوئے کہا کہ اس واقعہ نے بلوچستان کے حوالے سے جلتی پر تیل کا کام کیا ہے اور اس سے فوج کی بدنامی ہو رہی ہے۔ ایسے واقعات سے فوج کی جانبداری کو دھچکا لگےگااور اس پر مزید جھوٹے الزامات لگائے جائیں گے۔