عدنان عادل
بی بی سی اردو ڈاٹ کام، لاہور |  |
|  وکیل نے خود کو جج کے کمرے میں آگ لگا لی |
لاہور ہائی کورٹ میں منگل کو ایک وکیل نے ہائی وے پولیس کے خلاف احتجاج کرتے ہوئے چیف جسٹس کے کمرہ عدالت میں خود کو آگ لگالی اور شدید زخمی ہوگیا۔ یہ واقعہ منگل کو صبح ساڑھے دس بجے کے قریب چیف جسٹس افتخار چودھری کے کمرہ عدالت میں پیش آیا جہاں عینی شاہدین کے مطابق ایک پچپن سالہ وکیل بلال احمد ڈھلوں نے خود پر مٹی کے تیل کی شیشی الٹ لی اور آگ لگالی۔ اس وقت کمرہ عدالت میں موجود لوگوں کا کہنا ہے کہ وکیل نے آگ لگاتے وقت کہا کہ مجھے پولیس والے تنگ کر رہے ہیں۔ لوگوں نے کپڑا ڈھانپ کر وکیل کی آگ بجھائی اور انہیں عدالت عالیہ کے چیف سیکیورٹی آفیسر عارف نیازی سروسز ہسپتال میں لے گئے جہاں ابتدائی طبی امداد کے بعد انہیں میو ہسپتال کے برن یونٹ میں منتقل کر دیا گیا۔ ہائی کورٹ کے چیف سیکیورٹی آفیسر نے واقعہ کی تفصیل بتانے سے انکار کر دیا اور ان کے کہنے پر پولیس نے فوٹو گرافروں کو زخمی وکیل کی تصاویر اتارنے سے بھی روک دیا۔ ہائی کورٹ میں وکلاء کا کہنا تھا کہ زخمی وکیل بلال ڈھلوں نے کچھ دنوں پہلے یتیم خانہ کے علاقہ میں اپنے مکان کے گرائے جانے کو چیلنج کرتے ہوئے محکمہ ہائی وے کے خلاف ایک رٹ درخواست دائر کی تھی جو عدالت عالیہ نے مسترد کر دی تھی۔ وکیل اپنے مکان کے گرائے جانے پر سخت مایوس تھے جس پر احتجاج کرتے ہوئے انہوں نے یہ قدم اٹھایا۔ | 
یہ صفحہ دوست کو ای میل کیجیئے
پرِنٹ کریں
