عدنان عادل بی بی سی اردو ڈاٹ کام، لاہور

لاہور کے سیشن جج عبدالسلام خاور نے بی بی سی کوبتایا کہ لاہور کی سیشن عدالت میں ایک کمرہ میں وڈیو کانفرنسنگ کے آلات نصب کیے جارہے ہیں اور دوسری طرف لاہور کی ضلعی کیمپ جیل میں یہ آلات لگائے گئے ہیں۔

جج کا کہنا ہے کہ اس وڈیو ٹرائل کی ضرورت اس لیےمحسوس کی گئی کہ جب عادی مجرم کمرہ عدالت میں لائے جاتے ہیں تو امن و امان کی صورتحال خراب ہونے کا خدشہ رہتا ہے اور اسی طرح بعض بڑی سیاسی مقدمات میں سیاسی رہنماؤں کو کمرہ عدالت میں لانے سے ماحول خراب ہوسکتا ہے اس لیے اسی مقدمات کا وڈیو ٹرائل کیا جاۓ گا۔

انھوں نے کہا کہ اب تک ایسے مقدمات میں جیل کے اندر سماعت کی جاتی تھی لیکن اب سماعت کمرہ عدالت میں ہوا کرے گی۔

انھوں نے بتایا کہ وڈیو ٹرائل میں جج کمرہ عدالت میں رہے گا اور ملزم جیل کے ایک کمرہ میں جبکہ وکیل صفائی کو اختیار ہوگا کہ وہ جیل میں ملزم کے پاس رہے یا کمرہ عدالت میں۔ یہ سب لوگ وڈیو نظام کی وجہ سے ایک دوسرے کو دیکھ سکیں گے اور ایک دوسرے سے بات چیت کرسکیں گے۔