عدنان عادل بی بی سی اردو ڈاٹ کام، لاہور

بھارت بیس پاکستانی رہا کرے گا

لاہور میں رینجرز کے ترجمان محمد گلباز نے بتایا کہ دونوں ملکوں کے درمیان قیدیوں کا تبادلہ صبح دس بجے ہوگا۔ انہوں نے کہا کہ اتوار کی شام تک قیدی رینجرز کے حوالے نہیں کیے گئے تھے اورانھیں متعلقہ حکام کل صبح براہ راست واہگہ پر لائیں گے۔

ترجمان نے کہا کہ انہیں یہ معلوم نہیں کہ ان قیدیوں کی نوعیت کیا ہے البتہ ان کی تعداد بیس کے قریب ہے۔

ذرائع کا کہنا ہے کہ پاکستان کی طرف سے ہندوستان کے حوالے کیے جانے والے قیدیوں کی اصل تعداد انیس ہے جن میں سے لاہور کی کوٹ لکھپت جیل سے گیارہ، راولپنڈی سے دو اور سندھ سے چھ قیدی شامل ہیں۔

ذرائع کے مطابق ہندوستان بھی اپنی جیلوں میں بند پاکستان کے بیس قیدیوں کو پاکستان کے حوالے کرے گا اور یہ وہ لوگ ہیں جنہیں کارگل کی جنگ کے دوران میں یا غلطی سے سرحد پار کرنے کے الزام میں حراست میں لیا گیا تھا۔