ہارون رشید بی بی سی اردو ڈاٹ کام، پشاور

وانا میں قبائلی جرگے سے حکومت نے القاعدہ کے دوارکان اس کےحوالے کرنے کا مطالبہ کیا ہے

شکئی میں تازہ تلاشی کی کارروائی آج صبح شروع ہوئی جو آخری اطلاعات تک جاری ہے۔ البتہ کسی کامیابی کی اطلاع نہیں ہے۔ یہ دو ہفتے قبل اس علاقے میں القاعدہ کے مشتبہ حامیوں اور سرکاری دستوں کے درمیان خونریز لڑائی کے بعد پہلی تلاشی ہے۔

حکام کا کہنا ہے کہ تلاشی کے دوران ملنے والا اسلحہ بھی اکٹھا کیا جا رہا ہے۔

دوسری جانب وانا میں آج مقامی انتظامیہ اور احمدزئی وزیر قبیلے کے عمائدین کے درمیان مذاکرات میں حکومت نے ان سے دو مطلوب افراد مولوی عباس اور جاوید اتمان خیل کو حوالے کرنے کا مطالبہ کیا ہے۔ اس کے جواب میں قبائلیوں نے حکومت کے سامنے پہلے اقتصادی پابندیاں اٹھانے کی مانگ رکھی ہے۔ یہ بات چیت توقع ہے کل بھی جاری رہے گی۔

حکومت نے تیرا گرفتار قبائلی سرداروں کو بھی ڈیرہ جیل سے وانا منتقل کردیا ہے۔ انہیں گزشتہ ماہ لڑائی کے آغاز سے قبل حکومت نے تعاون نہ کرنے کے الزام میں حراست میں لے لیا تھا۔ ان کے بارے میں خیال ہے کہ شاید حکومت انہیں رہا کرنے کا ارادہ رکھتی ہے۔

دوسری جانب وانا کے قریب حکومت کے کہنے پر زڑی نور کیمپ سے چلے جانے والے افغان پناہ گزینوں کے مٹی کے گھر آج بلڈوزروں کی مدد سے مسمار کر دیے گئے ہیں۔ اس کیمپ میں مقامی لوگوں کے مطابق دس بیس گھرانے ہی باقی بچے ہیں۔

وانا میں مقامی صحافیوں نے آج ایک مرتبہ پھر انہیں جرگے کی کارروائی سے دور رکھنے کے واقعہ کی مذمت کی ہے۔ انہوں نے الزام لگایا کہ حکومت آزادیِ صحافت کو مکمل طور پر نظر انداز کر رہی ہے۔