اعجاز مہر بی بی سی اردو ڈاٹ کام اسلام آباد

امریکی فوج پاکستان اور افغانستان کی سرحد پر (فائل فوٹو)

پاکستان کے فوجی ترجمان میجر جنرل شوکت سلطان نے بی بی سی کو بتایا کہ جمعرات اور جمعہ کی شب امریکی افواج اتحادیوں کے ہمراہ جنوبی وزیرستان کے ایک گاؤں میں داخل ہوئیں اور بعض مکانات کی تلاشی لی۔

ترجمان کے مطابق امریکی افواج کو شبہ تھا کہ متعلقہ گاؤں سے کسی نے ان پر فائرنگ کی ہے۔ تاہم ان کا دعویٰ تھا کہ امریکی افواج کو کوئی ثبوت نہیں ملا اور وہ کسی کو گرفتار کئے بغیر واپس چلے گئے۔

فوجی ترجمان کا کہنا تھا کہ امریکی افواج نے پاکستانی علاقے میں واقع کسی گاؤں پر کوئی فائرنگ نہیں کی البتہ سرحدی گاؤں کی تلاشی لی ۔ ان کے مطابق متعلقہ گاؤں آدھا پاکستان اور آدھا افغانستان میں ہے، اور امریکی افواج نے اس گاؤں کے دونوں جانب تلاشی لی تھی۔

میجر جنرل شوکت سلطان کا کہنا تھا کہ امریکی افواج کے پاکستانی حدود میں داخلے پر امریکہ اور ان کے اتحادیوں سے پاکستان نے احتجاج کیا ہے۔

امریکی فوج اس علاقے میں مبینہ طور پر القاعدہ کے ارکان کی تلاش میں ہے۔(فائل فوٹو)

علاوہ ازیں پاکستان کے دفتر خارجہ کے ترجمان مسعود خان نے بھی پاکستانی حدود میں امریکی افواج کے داخلے کی تصدیق کرتے ہوئے بتایا کہ اس معاملے پر فوجی سطح پر احتجاج کیا گیا ہے۔

واضح رہے کہ پاکستان میں امریکی افواج کے گھس آنے کا ایک ماہ کے اندر دوسرا واقعہ ہے۔