علی سلمان
لاہور |  |
اتحاد برائے بحالیِ جمہوریت کی پنجاب شاخ نے اپنے صوبائی کارکنوں کو ہدایت کی ہے کہ وہ روپوش رہیں اور گیارہ مئی کو ہر صورت میں نیلا گنبد پہنچیں جہاں سے ایک جلوس شہباز شریف کے استقبال کے لیے روانہ ہو گا۔ اے آر ڈی کے رہنماوں نے کہا ہے کہ اس سلسلہ میں دفعہ ایک سو چوالیس کی بھی پرواہ نہیں کی جاۓ۔ اے آر ڈی کے رہنماؤں قاسم ضیا اور خواجہ سعد رفیق نے اتحاد میں شامل جماعتوں کے ایک اجلاس کے بعد مشترکہ پریس کانفرنس سے خطاب کرتے ہوئے کارکنوں سے مسلم لیگ (ن) کے صدر شہباز شریف کے استقبال میں بھر پور طریقے سے شرکت کرنے کی اپیل کی۔ قائدین نے کہا کہ اگر حکومت اس سلسلہ میں کوئی بات چیت کرنا چاہتی ہے تو اتحاد کے نمائندے تیار ہیں لیکن گیارہ مئی کے پروگرام پر کوئی سمجھوتہ نہیں ہوگا۔
پیپلز پارٹی پارلیمنٹیرین پنجاب کے صدرقاسم ضیا نے کہاکہ شہباز شریف کے استقبال میں اے آر ڈی کی تمام جماعتیں شامل ہونگی۔اے آر ڈی کا جلوس پر امن ہوگا۔انہوں نے سیاسی کارکنوں و رہنماؤں کی گرفتاریوں کی شدید مذمت کی اور حکومتی حلقوں سے سوال کیا کہ یہاں پر کسں کی حکومت ہے ؟ وزیر اعلی کہتے ہیں کہ دفعہ ایک سو چوالیس کی کوئی ضرورت نہیں اور ضلعی ناظم نے بدستور دفعہ ایک سو چوالیس لگا رکھی ہے۔انہوں نے کہا کہ پاکستان میں اصل جمہوریت اس وقت آۓ گی جب سیاسی قائدین وطن لوٹیں گے۔ پاکستان مسلم لیگ (ن) پنجاب کے جنرل سیکرٹری خواجہ سعد رفیق نے کہا کہ ہوائی جہاز کے ہائی جیک کرنے کے دعوے سب ایک ڈرامہ ہیں۔ اصل میں یہ تمام اقدامات ہوائی اڈوں کو سیل کیے جانے کے لیے کیے گئے ہیں۔انہوں نے کہا کہ تمام سیاسی کارکن گیارہ مئی کو ہر صورت لاہور کے ہوائی اڈے پر پہنچیں گےاور حکومت کی کسی نام نہاد پابندی کو نہیں مانیں گے۔ انہوں نے بی بی سی ڈاٹ کام سے بات کرتے ہوۓ بتایا کہ انہوں نے پہلےہی اپنےکارکنوں کو ہدایت کر رکھی ہےکہ وہ گرفتاری سے بچیں اور رات کو اپنے گھروں میں نہ سوئیں اور گیارہ مئی کو ہر صورت ہوائی اڈے جانےکے لیے شاہراہ قائد اعظم پر اکٹھے ہوں۔ | 
یہ صفحہ دوست کو ای میل کیجیئے
پرِنٹ کریں
