عزیزاللہ خان بی بی سی اردو ڈاٹ کام کوئٹہ

کوئٹہ میں حالیہ تشدد کے واقعات میں درجنوں ہلاک ہوئے تھے۔

بدھ کے روز کوئٹہ میں اخباری کانفرنس سے خطاب کرتے ہوئے انھوں نہ کہا ہے کہ عدالتی کمیشن واقعات کی تحقیقات کر رہا ہے جس کی سربراہی ہائی کورٹ کے جج کر رہے ہیں اس رپورٹ کے پیش کیے جانے کے بعد اس پر عمل درآمد کے لیے بھی ایک کمیٹی قائم کی جائے گی جو اس سارے عمل کو یقینی بنائے گی۔

انھوں نے کہا ہے کہ اعلی جرگہ میں تمام مکاتب فکر کے افراد شامل ہوں گے اس میں تمام مسلک سے تعلق رکھنے علماء کرام اور قبائلی قائدین مدعو کیے جائیں گے تاکہ اس مسئلے کا مستقل حل نکالا جا سکے انھوں نے کہا ہے کہ یہ جرگہ موجودہ حالات طے ہونے کے بعد طلب کیا جائے گا۔

سیاسی جماعتوں کو مدعو کرنے کے حوالے سے پوچھے گئے سوال پر انھوں نے کہا ہے کہ حزب اختلاف کی جماعتوں کو موجودہ صورتحال کے حوالے سے کمیٹییوں میں شامل کیا گیا ہے جبکہ تمام جماعتوں کا اجلاس بھی طلب کیا جا سکتا ہے لیکن ایسے اجلاس میں سیاسی جماعتوں کے قائدین اور اراکین اسمبلی صدر مملکت کے خلاف باتیں کرتے ہیں جو صحیح نہیں ہے انھوں نے کہا ہے کہ سیاسی جماعتوں کے قائدین اور اراکین کو چاہیے کہ وہ مثبت تنقید کریں اور بہتر تجاویز دیں نہ کہ صدر مملکت کے خلاف بیان بازی شروع کر دیں۔

جام محمد یوسف نے کہا ہے کہ آٹھ جون اور چار جولائی کے واقعات میں ملوث افراد کو گرفتار کر لیا گیا ہے اور ان سے مذید تفتیش کی جا رہی ہے ۔ انھوں نے کہا ہے ان ملزمان نے تسلیم کیا ہے کہ وہ ان وارداتوں میں شام تھے اور اس کے لئے یہاں سیف ہاؤس بنایا گیا تھا جس کے لیے رقم غیر ممالک نے دی تھی ۔ اس کا اعلان انسپکٹر جنرل پولیس شعیب سڈل نے بھی گزشتہ روز کیا تھا لیکن اس بارے میں مذید تفصیل فراہم نہیں کی گئی۔

جام یوسف نے کہا ہے کہ کہ اس وقت پولیس کے پاس جدید سہولیات نہیں ہیں یہاں تک کہ پولیس افسروں کی بھی کمی پائی جاتی ہے۔ اس بارے میں وفاقی حکومت سے رابطہ قائم کیا گیا ہے ۔ انھوں نے یہ خدشہ بھی ظاہر کیا ہے کہ باہر سے عملہ بلانے کے بعد ہم پر یہ تنقید کی جاتی ہےکہ یہاں باہر سے افسران کو تعینات کیا جاتا ہے اور مقامی افراد کی حق تلفی کی جاتی ہے۔