تحریک عدم اعتماد: کیا ارکانِ اسمبلی کو پارٹی کے خلاف ووٹ دینے سے روکا جا سکتا ہے؟

پاکستان کے وزیرِ اعظم عمران خان کے خلاف جمع کروائی گئی تحریکِ عدم اعتماد کے تناظر میں اسلام آباد میں واقع سندھ ہاؤس میں حکومتی جماعت پاکستان تحریکِ انصاف کے 20 سے زیادہ ارکانِ قومی اسمبلی کی موجودگی نے بعد ایک مرتبہ پھر ملک میں فلور کراسنگ اور ہارس ٹریڈنگ کے بارے میں بحث کو جنم دیا ہے۔

ان ارکان میں شامل تحریکِ انصاف کے جہانگیر ترین گروپ سے تعلق رکھنے والے راجہ ریاض نے کہا ہے کہ تحریکِ عدم اعتماد پر وہ 'اپنے ضمیر کے مطابق ووٹ دیں گے، ہمارا خان صاحب سے اختلاف ہے اس لیے ووٹ اپنے ضمیر کے مطابق دیں گے'۔

پاکستانی میڈیا پر ان ارکان کے انٹرویو نشر ہونے کے بعد وزیرِ اطلاعات فواد چوہدری نے کہا ہے کہ 'ایکشن کے ڈر سے لوٹے ظاہر ہونا شروع ہو گئے ہیں'۔

ان کا کہنا تھا کہ پانچ لوگوں کو 15 سے بیس کروڑ ملے تو خچروں اور گھوڑوں کی منڈیاں لگ گئیں۔ وزیرِ اطلاعات کا یہ بھی کہنا تھا کہ یہ لوگ 'باضمیر ہوتے تو استعفیٰ دیتے اور سپیکر کو ان ضمیر فروشوں کو تاعمر ناابل قرار دینے کی کارروائی کرنی چاہیے۔'

فواد چوہدری ماضی قریب میں بھی یہ کہہ چکے ہیں کہ فلور کراسنگ کرنے والوں پر آئین کی شِق 63 اے کے تحت کارروائی کی جائے گی۔

پاکستان تحریکِ انصاف کی حکومت کی جانب سے بھی بارہا کہا گیا ہے کہ جو ارکان وزیرِ اعظم عمران خان کے خلاف عدم اعتماد کا ووٹ ڈالیں گے ان کی اسمبلی کی رکنیت منسوخ کردی جائے گی۔ ۔

سوال یہ ہے کہ کیا پاکستان میں کوئی رکن اسمبلی اپنی پارٹی کے خلاف ووٹ دے سکتا ہے اور کوئی بھی سیاسی جماعت اپنے کسی رکن کو اپنے خلاف ووٹ دینے سے کیسے روک سکتی ہے؟

ساتھ ہی ساتھ یہ سوال بھی کیا جا رہا ہے کہ کیا سپیکر کسی ووٹ کو گننے سے انکار کر سکتا ہے؟

فلور کراسنگ کی شق کی تاریخ

ان سوالات پر بات سے پہلے یہ سمجھ لیتے ہیں کہ ہر روز جو ہم سب فلور کراسنگ یا ہارس ٹریڈنگ جیسے الفاظ سنتے ہیں ان کا مطلب کیا ہے؟ اور سیاسی جماعتیں اپنے ارکان کے کس عمل کو فلور کراسنگ مانتی ہیں؟

سادہ الفاظ میں کسی منتخب رکن کا اپنی جماعت کو چھوڑ کر دوسری جماعت کے حق میں ووٹ دینا فلور کراسنگ تصور ہوتا ہے۔ برطانیہ میں فلور کراسنگ کو غیر اخلاقی عمل تصور کیا جاتا ہے۔ لیکن اس کے کوئی قانونی نتائج نہیں ہوتے۔ آپ ان اراکینِ اسمبلی پر دباؤ ڈال سکتے ہیں کہ وہ اپنے عہدے سے مستعفی ہوجائیں لیکن ان کے خلاف قانونی کارروائی نہیں کرسکتے۔

پاکستان کی آئینی تاریخ پر بات کرتے ہوئے انٹرنیشنل کورٹ آف جسٹس کی لیگل ایڈوائزر ریما عمر نے بتایا کہ 1973 کے آئین میں انحراف کرنے والے اراکین کے بارے میں شروع میں کوئی واضح شِق نہیں تھی۔

ان کا کہنا ہے کہ 1997 میں نواز شریف کی دوسری حکومت کے دوران چودھویں ترمیم کے تحت سیاسی جماعت سے انحراف کرنے کے حوالے سے یہ شِق یعنی 63 اے آئین کا حصہ بنائی گئی۔

اس شِق کے تحت کسی بھی سیاسی جماعت کے رکن کے خلاف پارٹی کے خلاف ووٹ کرنے پر ڈسپلنری ایکشن ہوسکتا ہے۔

ریما عمر نے بتایا کہ اس شِق کو آئین کا حصہ بنانے کا مقصد اس بات کا اطمینان کرنا تھا کہ حکومت کے کام کرنے کے طریقے یا کارروائی میں کوئی خلل نہ آسکے۔ 'اس دوران بھی اس شِق کے معنی خاصے جامع تھے۔ یعنی آپ سیاسی جماعت کے خلاف کچھ بھی نہیں کرسکتے یا بول سکتے تھے۔ نواز شریف کے دور میں انڈیا اور پاکستان کے اس قانون میں کوئی خاص فرق نہیں تھا۔'

چودھویں ترمیم کے تحت پارٹی کے سربراہ کے پاس یہ طاقت تھی کہ وہ کسی رکن کو انحراف کرنے کے الزام پر برطرف کردے۔

سابق صدر اور فوجی آمر پرویز مشرف کے دور میں اس شِق کا دائرہ مزید تنگ کیا گیا۔ اس دور میں اس شِق کے تحت سترہویں ترمیم کے تحت یہ طے کیا گیا کہ تحریک عدم اعتماد کی ووٹنگ، وزیرِ اعظم اور وزیرِ اعلیٰ کے انتخابات، اور آئینی ترامیم کے دوران اراکینِ اسمبلی کو پارٹی کے جاری کردہ احکامات کے تحت ہی ووٹ ڈالنا ہوگا۔

سپیکر کے کسی ووٹ کو نہ گننے کا سوال

فواد چوہدری نے چند روز قبل ایک بیان میں کہا تھا کہ اگر سپیکر اسمبلی کو لگے کہ کسی رکن نے پارٹی چھوڑ دی ہے تو وہ اس رکن کا ووٹ نہیں گنیں گے۔ کیا ایسا ممکن ہے؟

سینیئر قانون دان اور پی پی پی کے رہنما اعتزاز احسن نے حال ہی میں مقامی ٹی وی چینل اے آر وائی کے ایک پروگرام میں اسی نوعیت کے ایک سوال کے جواب میں کہا کہ ’یہ تو آئین کے ساتھ مذاق ہے کہ سپیکر یا کوئی بھی کسی ممبر کے ووٹ کو کینسل کر سکے کہ جی اس کا ووٹ ہی نہیں ہو گا۔‘

انھوں نے کہا ’یہ تو ہو ہی نہیں سکتا، ووٹ اس کا پڑے گا۔‘

انھوں نے بات جاری رکھتے ہوئے کہا کہ ’جو بھی اپنی پارٹی کی ہدایت کے خلاف ووٹ دے گا وہ بھی ووٹ پڑے گا۔ شمار بھی ہوگا۔ اور جس طرف اس کا رجحان ہوگا اسی طرف سمجھا جائے گا۔‘

انھوں نے کہا کہ اگر پارٹی کے خلاف بھی ہے ’تو اس کی گنتی ہو گی۔‘ اعتزاز احسن نے اینکر کی طرف سے اس سوال پر کہ اگر سپیکر فیصلہ کر لیتے ہیں کہ انھوں نے اس ووٹ کو نہیں گننا تو پھر کیا ہو گا؟

اعتزاز احسن کا جواب تھا کہ ’ایسا نہیں ہو گا۔ ایسا ہو ہی نہیں سکتا۔ ممکن ہی نہیں ہے۔ آپ سپیکر کے ذہن میں اور پرائم منسٹر کے ذہن میں ایسی باتیں نہ ڈالیں جو ممکنات میں ہی نہیں ہیں۔‘

اعتزاز احسن نے کہا جو یہ مشورہ دے رہے ہیں حکومت کو، وزیر اعظم کو سپیکر کو وہ ان کے دشمن ہیں۔

سینیٹ کے سابق چیئرمین رضا ربانی نے اسی موضوع پر بی بی سی اردو سے بات کرتے ہوئے کہا کہ یہ ماورائے آئین بات ہے۔ انھوں نے کہا کہ ’آرٹیکل 63 اے جب ایک جرم ہو گا، اگر آپ اس کو جرم کہتے ہیں، تو تب وہ عمل میں آئے گا۔‘

انھوں نے کہا کہ ’اگر کوئی ممبر ووٹ پارٹی کے وہپ کے خلاف دے گا تو اس کے بعد 63 اے کے اندر ایک پورا طریقہ کار دیا ہوا ہے۔‘

رضا ربانی نے اپنی بات جاری رکھتے ہوئے کہا کہ ’لہذا سپیکر کے پاس کوئی اختیار نہیں ہے کہ وہ کسی ممبر کو اپنا ووٹ استعمال کرنے سے روکے۔ اس ووٹ کو استعمال کرنے کے بعد کیا نتائج ہوں گے۔ وہ ایک الگ بات ہے۔ لیکن ووٹ کاسٹ ہو گا۔‘

کیا پاکستان تحریکِ انصاف اپنے اراکین کو عدم اعتماد کا ووٹ ڈالنے سے روک سکتی ہے؟

سابق اٹارنی جنرل عرفان قادر کے مطابق اس کا سادہ سا جواب ہے کہ پارٹی ایسا نہیں کرسکتی۔ بی بی سی سے بات کرتے ہوئے انھوں نے کہا کہ 'پی ٹی آئی اپنے اراکین کو نہیں روک سکتی۔ اور اگر فرض کریں کہ روک لیں اور نا اہل کرنے کا ریفرنس بھیج بھی دیں تو پی ٹی آئی کو اسمبلی میں وزیرِ اعظم کے حق میں اعتماد کے لیے مزید ووٹ درکار ہونگے۔'

سندھ ہاؤس میں ناراض حکومتی اراکین اور تحریک عدم اعتماد: عمران خان کے پاس اب کیا آپشنز ہیں؟

مائنس تحریک انصاف قومی حکومت کی تجویز، کیا آئین میں اس کی گنجائش ہے؟

تحریک عدم اعتماد: کیا ارکانِ اسمبلی کو پارٹی کے خلاف ووٹ دینے سے روکا جا سکتا ہے؟

تحریکِ عدم اعتماد: گجرات کے چوہدریوں کی لاہور واپسی لیکن فیصلہ کیا ہو گا؟

تو اب سوال پیدا ہوتا ہے کہ کیا نااہل کیے گئے ارکان کو نکالنے سے وزیرِ اعظم کے حق میں اعتماد کے لیے ووٹ کم پڑسکتے ہیں؟

عرفان قادر نے کہا کہ ایسا بالکل ممکن ہے۔ 'اس وقت قومی اسمبلی میں پی ٹی آئی کی اکثریت ہے۔ اگر وہ اس اکثریت میں سے بیشتر کو نکال دیتی ہے، یا ان کا ووٹ نہیں گنتی، تو پھر اعتماد بحال کرنے کے لیے مزید ووٹ کہاں سے لائی گی؟'

قومی اسمبلی میں وزیرِ اعظم پر عدم اعتماد کے لیے اپوزیشن کو 172 ووٹ چاہیئیں۔ جبکہ اپوزیشن کا دعویٰ ہے کہ ان کے پاس تمام حزبِ اختلاف کی جماعتوں کے اراکین، پی ٹی آئی کے باغی گروپ اور دیگر اتحادیوں کو ملا کر 200 کے قریب اراکین بنتے ہیں۔

اس وقت اسی حوالے سے چہ میگوئیاں جاری ہیں کہ عدم اعتماد کی تحریک کا نتیجہ کیا نکلے گا۔ پاکستان پیپلز پارٹی کے رکن اور سابق سینیٹر فرحت اللہ بابر نے بتایا کہ 'آئینی اور قانونی طریقہ کار پر اگر عمل کیا جائے تو معاملہ کافی سیدھا سادہ سا ہے۔ لیکن اس وقت وزیرِ اعظم غصے میں لگ رہے ہیں اور عین ممکن ہیں کہ وہ خود کو بحال کرنے کے لیے ہر حربہ استعمال کریں گے۔'

کسی رکن کو نااہل کرنے کا طریقہ کار کیا ہے؟

ریما عمر کے مطابق آئین کے مطابق یہ طریقہ کار رکنِ قومی اسمبلی کے ووٹ ڈالنے کے بعد ہی شروع ہوتا ہے۔ اور ماہرین کے مطابق یہ مرحلہ خاصا طویل ہے جس کے مکمل ہونے میں کئی ماہ لگ سکتے ہیں۔ 30 دن کے اندر رکن فیصلے کے خلاف سپریم کورٹ جاسکتے ہیں جس کے بعد سپریم کورٹ میں 60 سے 90 دن مزید لگ سکتے ہیں۔

ریما عمر کے مطابق پاکستان کے آئین میں سپیکر اسمبلی کی حیثیت ’پوسٹ آفس سے بھی کم ہے۔‘ اٹھارہویں ترمیم کے بعد آئین کی شِق 63 اے میں یہ واضح کردیا گیا ہے کہ اگر کوئی ممبر قومی اسمبلی یا صوبائی اسمبلی اپنی جماعت کے خلاف ان خاص حالات میں ووٹ کرتا ہے یا ووٹ ڈالنے سے منع کرتا ہے تو جماعت کا سربراہ سپیکر اسمبلی کو رکن کے منحرف ہونے کا ریفرنس دیتے ہیں۔

انھوں نے بتایا کہ سپریم کورٹ نے اس کی مزید وضاحت کرتے ہوئے کہا ہے کہ آپ کسی رکن کو بغیر سنے ریفرنس نہیں دے سکتے۔ جس کے لیے پارٹی سربراہ رکن کو پہلے شو کاز نوٹس دیتے ہیں، رکن پارٹی سربراہ کو جواب دیتے ہیں کہ انھوں نے کیوں یہ فیصلہ کیا۔ اس کے بعد پارٹی سربراہ ڈیکلیریشن یا ریفرنس سپیکر کو بھیجتے ہیں۔ جس کے بعد سپیکر رکن کے خلاف اس ڈیکلیریشن یا ریفرنس کو الیکشن کمیشن میں بھیجتے ہیں۔

ریما عمر نے کہا کہ 'اگر کسی وجہ سے سپیکر الیکشن کمیشن کو ریفرنس نہیں بھیجتے تو عمومی طور پر یہ خیال کر لیا جاتا ہے کہ اگلے دو دن میں وہ اس ریفرنس کو ای سی پی کو بھیج دیں گے۔'

الیکشن کمیشن کے پاس یہ ریفرنس پہنچنے پر وہ رکنِ قومی اسمبلی کو سنتے ہیں جس کے بعد رکن کی نا اہلی کا حتمی فیصلہ الیکشن کمیشن کے پاس ہوتا ہے۔

ساتھ ہی رکنِ قومی اسمبلی کے پاس یہ حق ہے کہ وہ سپریم کورٹ میں اپنے خلاف درخواست یا تحریری ریفرنس کو سپریم کورٹ میں چیلنج کرسکتے ہیں۔

پاکستان پیپلز پارٹی کے سینیٹر مصطفی نواز کھوکھر نے کہا کہ اس کی ایک بڑی مثال پی ٹی آئی کی سابق رکن عائشہ گلالئی کی ہے۔ عائشہ گلالئی اور عمران خان کے مقدمے میں سپریم کورٹ نے کہا تھا کہ الیکشن کمیشن میں ریفرنس جمع کرانے سے پہلے اپنے پارٹی رکن کو سننا چاہیے۔