کل سامنے آنے والے چیلنجز ہمارے دور کے سب سے بڑے چیلنجز ہیں: اوباما

برطانیہ کے وزیر اعظم گورڈن براؤن نے منگل کو ہونے والے امریکی انتخابات کو تاریخ ساز انتخابات قرار دیا اور کہا کہ وہ اور سینیٹر باراک اوباما میں کئی اقدار مشترک ہیں۔

انتخابی نتائج کی تفصیل

اوباما نے ووٹ ڈالا

امریکہ معرکہ دو ہزار آٹھ

باراک اوباما، تصاویر میں

فرانس کے صدر نکولس سرکوزی نے کہا ہے کہ باراک اوباما کے صدر منتخب ہونے سے امید کی ایک توانا کِِرن دیکھنے میں آئی ہے۔

اقوامِ متحدہ کے سیکریٹری جنرل بان کیمون نے کہا ہے کہ انہیں امید ہے کہ مسٹر باراک اوباما کی کامیابی سے اشتراک عمل کے ایک نئے دور کا آغاز ہو گا۔

امریکہ کے موجودہ صدر جارج بش نے کہا ہے کہ مسٹر باراک اوباما کو عبوری دور میں ان کا مکمل تعاون حاصل ہو گا۔

	باراک اوبامہ نے ہر رنگ و نسل کے امریکیوں سے اپیل کی کہ وہ متحد ہو کر ملک کو موجودہ سنگین مسائل سے نکالنے میں ان کا ساتھ دیں

باراک اوباما کے والد کے آبائی ملک کینیا کے صدر موائے کِباکی نے ان کی کامیابی کی خوشی میں جمعرات کے روز قومی تعطیل کا اعلان کیا ہے۔

نو منتخب امریکی صدر جنوری میں اپنے عہدے کا حلف اٹھائیں گے۔

دوسری طرف سینیٹر باراک اوباما نے اپنی ٹیم کے ارکان کو متعارف کرانا شروع کر دیا ہے۔

امریکی خبر رساں ادارے ایسوسی ایٹڈ پریس کے ڈیموکریٹک ذرائع کے حوالے سے کہا ہے کہ الینوائے سے کانگریس کے رکن رحم عمانوئیل وہائٹ ہاؤس کا چیف آف سٹاف بننے کی پیش کش کی ہے۔

ابھی تک یہ واضح نہیں ہے کہ سابق صدر بِل کلنٹن کے دور حکومت میں مشیر کا عہدے رکھنے والے رکن کانگریس نے یہ پیش کش قبول کی ہے یا نہیں۔

ڈیموکریٹک پارٹی نے صدارتی انتخاب جیتنے کے ساتھ ساتھ کانگریس کے دونوں ایوانوں میں بھی اپنی پوزیشن مستحکم کر لی ہے۔

ایوانِ نمائندگان میں 435 نشستوں اور سینٹ کی سو میں سے 35 نشستوں پر انتخاب ہوا ہے۔ ڈیموکریٹ پارٹی کو امید ہے کہ وہ سینٹ میں اپنی اکثریت کو 60 ووٹوں تک بڑھا لے گی۔

	صدر جارج بش نے کہا ہے کہ مسٹر باراک اوباما کو عبوری دور میں ان کا مکمل تعاون حاصل ہو گا

سینیٹر باراک اوباما کی کامیابی کو امریکہ میں سیاہ اور سفید فاموں کے درمیان تعلقات میں ایک نئے باب کا آغاز قرار دیا جارہا ہے۔

مبصرین کے مطابق اس انتخاب میں ’بریڈلی افیکٹ‘ کا کوئی اثر دیکھنے میں نہیں آیا۔ یعنی یہ خطرہ بے بنیاد ثابت ہوا کہ کچھ سفید فام ووٹر جو انتخابی جائزوں میں اوباما کی حمایت کی بات کر رہے تھے، وہ بالآخر سفیدفام امیدوار کو ووٹ دیں گے۔

تبدیلی کا نقارہ

گزشتہ روز باراک اوباما نے ایک بہت بڑے مجمع سے خطاب کرتے ہوئے کہا: ’طویل عرصے بعد ہی سہی لیکن آج امریکہ میں تبدیلی آ گئی ہے۔‘

امریکی صدارتی انتخابات میں کامیابی کے بعد اپنے خاندان اور نو منتخب نائب صدر جو بائڈن کے ہمراہ شکاگو کے گرینڈ پارک میں ہزاروں کے اجتماع سے خطاب کرتے ہوئے انہوں نے کہا کہ تبدیلی کا یہ سفر بڑے عرصے سے جاری تھا اور آج رات امریکہ میں تبدیلی کی وہ گھڑی آ پہنچی ہے۔

اپنے خطاب میں سینیٹر اوباما نے کہا: ’اگر کسی کو ذرا بھی شبہ ہے کہ امریکہ میں ہر چیز ممکن نہیں ہے، جس کو یہ حیرانی ہے کہ آج کل کے دور میں بھی ہمارے آباؤ اجداد کا خواب زندہ ہے، جس کو ہماری جمہوریت کی طاقت پر شک ہے، آج کی رات اس کے لیے جواب ہے۔‘

انہوں نے کہا کہ جان مکین نے انہیں ’انتہائی فراخدلانہ‘ انداز میں کال کیا ہے۔

	صدارتی انتخابات میں باراک اوباما کی کامیابی پر دنیا بھر میں زبردست جوش و خروش دیکھنے میں آ رہا ہے

’انہوں نے امریکہ کے لیے ایسی قربانیاں دی ہیں جن کے متعلق ہم میں سے اکثر سوچ بھی نہیں سکتے تھے۔‘

انہوں نے اپنے خاندان کے لیے محبت بھرے الفاظ ادا کیے اور اپنی بیٹیوں سے کہا: ’ساشا اور ملیا، میں تم سے اتنا پیار کرتا ہوں کہ تم سوچ بھی نہیں سکتیں۔ اور اب تمہیں نیا پپی (کتے کا بچہ) ملے گا جو ہمارے ساتھ وائٹ ہاؤس جائے گا۔‘

اس کے ساتھ ساتھ انہوں نے کہا کہ ’آج کی رات جب ہم جشن منا رہے ہیں، ہمیں معلوم ہے کہ کل ہمارے سامنے آنے والے چیلنجز ہمارے دور کے سب سے بڑے چیلنجز ہیں ۔ دو جنگیں، سخت خطرے میں دنیا، اور صدی کا سب سے بڑا اقتصادی بحران۔‘

انہوں نے کہا کہ ’ہمارے سامنے لمبی سڑک ہو گی۔ ہماری چڑھائی عمودی ہو گی۔ لیکن امریکہ ۔ میں کبھی بھی اس سے زیادہ پر امید نہیں تھا جتنا آج کی رات ہوں کہ ہم وہاں (منزل پر) پہنچیں گے۔‘

انہوں نے کہا کہ بحثیت صدر ان کا انتخاب وہ تبدیلی نہیں جس کا انتخابی مہم میں ذکر کیا جاتا رہا ہے، بلکہ اس تبدیلی کا آغاز ہے۔ انہوں نے ہر رنگ و نسل کے امریکیوں سے اپیل کی کہ وہ متحد ہو کر ملک کو موجودہ سنگین مسائل سے نکالنے میں ان کا ساتھ دیں۔